Operacion lobist “Shpëtoni klientin Berisha” një ditë para ardhjes së Reeker?

Kryelobisti i Berishës në Uashington, Tony Podesta ka mbërritur me urgjencë në Tiranë një ditë para ardhjes së Filip Rikerit – raporton sot e përditshmja Dita duke cituar burime diplomatike.

Shkruan Dita në kryeartikullin e saj:  “Philip T. Reeker ka mbërritur në Tiranë të enjten e 21 Shkurtit të këtij viti, por Berisha ka kërkuar me urgjencë Tony Podestën kur është njoftuar mbi këtë vizitë. Podesta ka mbërritur në Rinas një ditë përpara mbërritjes së Reeker-it, të mërkurën e datës 20 Shkurt në mbrëmje. Ai është takuar me kryeministrin Berisha dhe më pas është akomoduar në hotel “Sheraton”. Ditën që Podesta ka mbërritur në Tiranë, Reeker ndodhej në Bruksel, ndërsa priste që të nesërmen të nisej për në Tiranë…”

Sipas së përditshmes në fjalë, të nesërmen e vizitës së Rikerit, më datën 22 shkurt, lobisti Podesta, i ka hipur avionit në Rinas dhe është larguar drejt Shteteve të Bashkuara: “Me gjasë Podesta ka mbërritur i pakënaqur në Amerikë, pasi mesazhi i shprehur nga Reeker në Tiranë, ishte krejt tjetër nga mesazhi që do preferonte klienti i Podestës, Sali Berisha…” – shkruan gazeta. A.N.