5 arsye pse një si Berluskoni është akoma në lojë - sipas IHT

"Të huajt e kanë të vështirë të kuptojnë pse një person që e udhëhoqi Italinë në prag të falimentimit në vitin 2011, i akuzuar për mashtrim tatimor, për lidhje me mafian, për prostitucion me të mitura dhe keqpërdorim të detyrës publike, ende arrin të konkurrojë  në zgjedhjet kombëtare, - shkruan International Herald Tribune për zgjedhjet në Itali dhe më pas rendit arsyet e asaj që e quan "film i parë dhe i riparë" me Berluskonin:

1 - Pasuria dhe media. Përveç të qenët një nga njerëzit më të pasur të vendit, mediat që ka në pronësi, i kanë dhënë Berluskonit ndikim në të gjitha aspektet e jetës ekonomike italiane. “Freedom House” ka renditur Italinë si vendin e vetëm evropiano-perëndimor me një shtyp “pjesërisht të lirë”.

2- Një numër njerëzish përfitojnë drejtpërsëdrejti nga fitorja e tij. Që nga 1994, Berluskoni ka qenë gjerësisht i pranueshëm në mesin e biznesmenëve dhe individëve privatë, të cilët përfitojnë nga rregulloret e buta të qeverisë.

3 - Historikisht, votuesit italianë kanë qenë gjithmonë të tërhequr nga 'burrat e fortë'. Kjo ka ndodhur me Musolinin në vitet 1920, por edhe me popullaritetin e figurave të tjera si kryeministri i ndjerë socialist, Bettino Crax, lideri i ndjerë komunist, Enrico Berlinguer dhe së fundi komiku i shndërruar në politikan Beppe Grillo. Kjo në një masë shpjegon magjepsjen e Italisë nga figurat karizmatike. Italianët i shohin këta burra të fortë si tërheqës edhe kur ata anashkalojnë proceset demokratike. Me pamjen e një të riu, elegant dhe pothuajse i paturp Berluskoni i përshtatet lehtë këtij imazhi.

4 - Italianët janë një popull që bëjnë tifo për një parti politike, aq verbërisht dhe në mënyrë intensive sa edhe për një ekip të preferuar futbolli. Berluskoni e ka në fakt një ekip futbolli, por ky zakon është i rrënjosur në konfrontimin gjatë kohës së Luftës së Ftohtë ndërmjet dy partive politike, Kristian-demokratëve dhe komunistëve. Berluskoni ka trashëguar votat e partisë Kristian-demokrate, pasi ajo ra nga skandalet e korrupsionit.

5 - Mungesa e një lideri karizmatik në qendrën e majtë. A.N.