Opinionistët më në zë të Italisë i japin munxët Beppe Grillos

“Nuk votëbesoj asnjë qeveri, në asnjë rrethanë; nëse doni, mbështesni ju një qeveri të Lëvizjes sime” – kjo është ajo që Grillo u thotë në thelb partive të tjera në parlament. Shumëkush ka besuar se pas zgjedhjeve, Grillo do shtrohej e do të “bëhej politikan”, por s’është kështu. Grillo duket se i ka mbushur mendjen vetes se ai mund të ndryshojë Italinë, madje dhe botën. Mirëpo, ky “vizion” i tij nuk ka ngjitur shumë tek publicistët e opinionistët italianë. Ia mbështesin tek-tuk ndonjë ide, por në tërësi e përqeshin, e denigrojnë, apo ia vënë në dyshim kredot dhe takatin.

Sot binte në sy një shkrim i Eugenio Scalfarit në la Repubblica dhe i Ferruccio de Bortoli në il Corriere della Sera. I pari, pasi përshëndet reagimin e Presidentit Napolitano ndaj fyerjes që rivali socialdemokrat i Merkelit kish bërë në drejtim të Berlusconit e Grillos (“janë dy kllounë”, tha ai), lë të nënkuptohet se ajo që gjermani tha është e vërtetë, megjithatë: “Janë dy komikë, s’ke ç’thua; njëri është bufon që përbuz etikën publike e shpesh fqinjëron me kriminalitetin, dhe tjetri është një bufon që ka në mendje transformimin total të strukturës institucionale të vendit; ky i dyti, Grillo pra, përdor etikën publike për të arritur objektivat e vet, dhe bën për vete njerëz duke lozur si bufon”.

De Bortoli është më analitik në kritikën e tij: “Në programin e Grillos ka gjëra që mund të mbështeten, por në tërësinë e vet, ky program nuk bën gjë tjetër, veçse tregon rrugët më të shkurtëra për të përfunduar në varfëri”, thotë ai.

Ndërsa nga e djathta i kanë dhënë munxët me kohë Grillos. Vittorio Feltri e quante thjesht vulgar në një shkrim të sotëm në Il Giornale.

Re.Pu.