Në listat e PS për deputetë, edhe Sollaku, disa ish-prokurorë dhe një gazetar i televizionit TCH – shkruan MAPO

E përditshmja MAPO raporton se në listat e kandidatëve për deputetë në PS do gjejnë vend edhe prokurorë e gazetarë të tjerë vec rastit Peza. Shkruan MAPO në raportimin e saj ndër të tjera:

“Kryesocialisti Edi Rama ka prezantuar publikisht vetëm dy prej tyre gjatë fundjavës: Alfred Pezën si kandidat në Peqin dhe biznesmenin Parid Cara, në Kavajë. Burime të MAPO-s bëjnë me dije se përveç Pezës, një tjetër gazetar do të kandidojë për PS-në në zgjedhjet e 23 qershorit, duke lënë profesionin e tij. Marin Mema, gazetar i Top Channel, është konfirmuar tashmë si kandidat në pjesën e sigurt të listës së PS. Kohët e fundit gazetari është parë të hyjë shpesh në selinë e PS-së”

Në listën e deputetëve të PS do ketë edhe disa ish-prokurorë sipas MAPO-s dhe rendit emrat Theodhori Sollaku, Ulsi Manja e Vexhi Muçmata. “Prurjet e reja, të cilat projektohen fill për karriget në Kuvend kanë zvogëluar hapësirat për deputetët aktualë të PS. Në pritje të rikonfirmimit shumë prej tyre kërkojnë që lista e kandidatëve për deputetë të votohet nga anëtarësia, thirrje të cilat nuk janë marrë parasysh deri më tash nga lidershipi” – shkruan MAPO. (a.n.)