Kur regjimet hanë arkitektët e tyre

Kadri Hazbiu ishte ministër i brendshëm i regjimit të Hoxhës dhe një prej arkitektëve të mekanizmit të tij të dhunës. Deri ditën kur përfundoi vetë viktimë e po të njëjtit mekanizëm. Një procescerbal i klasifikuar si ‘tepër sekret’ përshkruan mesnatën e 9 shtatorit 1983, datë në të cilën Shqipëria komuniste pushkatoi ministrin e vet të brendshëm dhe 3 funksionarë të tjerë të lartë të regjimit. Dokumenti arkivor i botuar nga e përditshmja DITA bën me dije ndër të tjera se pas vendimit të Gjykatës të ekzekutuarit kishin kërkuar nga Kuvendi t’u falej jeta, kërkesë e cila u ishte refuzuar.

Thuhet në këtë dokument:  “Presidiumi i Kuvendit Popullor, me shkresën Nr. 1582/1 datë 9.9.1983, nuk ua fali jetën të dënuarve: 1-Kadri Hazbi Hazbiut 2-Feçor Refat Shehut 3-Llambi Vasil Peçinit 4-Llambi Petro Ziçishtit. Të dënuarit, pasi u çuan në vendin e ekzekutimit, u njoftuan nga Prokurori i Përgjithshëm se Presidiumi i Kuvendit popullor u refuzon kërkesën për falje. Të dënuarit Kadri Hazbiu dhe Feçor Shehu u shprehën se janë të pafajshëm, kurse të dënuarit Llambi Ziçishti e Llambi Peçini nuk thanë gjë. Pas këtij veprimi, në ora 24:00 të datës 9.9.1983 u krye ekzekutimi me pushkatim për të dënuarit Kadri Hazbiu, Feçor Shehu, Llambi Peçini e Llambi Ziçishti. Në ekzekutimin e vendimit me vdekje morën pjesë Prokurori i Përgjithshëm shoku Rrapi Mino, zëvendësministrat e Punëve të Brendshme Zylyftar Ramizi dhe Agron Tafa, sekretar (oficer) Afuz Murati, mjeku Nevzat Vigani dhe oficeri Nikolla Shkurti…” a.n.

Më shumë:

http://gazetadita.al/ali-ceno-si-u-pergatit-fejesa-e-skender...