T'i mbrosh apo t’u japësh munxët - pyet Mustafa Nano

Mes ndërdyshjesh e skrupujsh – sic e pohon vetë në fund të shkrimit, - Mustafa Nano ngre sot një pyetje të vështirë në editorialin e vet në të përditshmen SHQIP: Ç’duhet bërë në rrethanat e një regjimi iliberal (Zakaria)? Cila duhet të jetë qasja ndaj institucioneve të cilët teorikisht duhen mbrojtur, por praktikisht janë të kontrolluara nga ekzekutivi?  Nano merr një shembull nga ditët e fundit, kopertinën e gazetës DITA, një ditë pasi u mor vendimi i Gjykatës lidhur me çështjen e 21 janarit.

Shkruan Nano ndër të tjera: “Më duhet të pohoj, se titulli “Pështyjeni” i shkruar mbi fytyrën e kryetarit të trupës gjykuese, me të cilin u hap e përditshmja “Dita” një ditë pasi u mor vendimi i Gjykatës lidhur me çështjen e 21 janarit, ndonëse ishte reagimi më adekuat që pritej nga një gazetari opozitare, ishte shumë i fortë edhe për sytë e mi. Nuk e shoh si një zgjidhje, pasi një agresion i tillë krijon një klimë të frikshme mosbesimi e delegjitimimi të sistemit të drejtësisë, e në këtë klimë gjyqtarët, ashtu si dhe përfaqësuesit e institucioneve të tjera, detyrohen të kërkojnë strehë edhe ca më shumë, për një kundërveprim instiktiv vetëmbrojtjeje, nën çatinë e këtij regjimi... Por nga ana tjetër, reagimi i dobët dhe i belbët në situatën, kur gjykatat e gjyqtarët e trembur, të kërcënuar apo të blerë “nuk arrijnë të gjejnë” dot autorët e një krimi që u bë sheshit, në mënyrë arrogante, nën vështrimin e kamerave televizive, nga një qeveri që drejtohet në mënyrë banditeske, kundër katër vetëve, që ishin të pafajshëm, të paarmatosur, të parrezikshëm, reagimi i dobët në këto rrethana pra do të ishte një zgjidhje më e keqe, e do të ishte mënyra më e mirë për të inkurajuar ata që e kanë vënë përfund këtë vend e këtë shoqëri. E prandaj, ndonëse mes ndërdyshjesh e skrupujsh, më duhet të them se të denoncosh fort e t’u japësh munxët ca institucioneve të korruptuara e të kalbura duke marrë në sy rrezikun e paralizimit dhe të asfiksimit për fare të tyre, është më mirë se sa t’i mbrosh ato me idenë se kështu ruhet një minimum i rendit e stabilitetit institucional…”

Pak më sipër, Nano u drejtohet dashnorëve “të përgjëruar” të institucioneve dhe shkruan:

“Është tepër vonë për të marrë poza e për të shitur dëngla të tilla. Beteja në mbrojtje të institucioneve nuk mund të jetë një betejë sezonale. Ku kanë qenë këta njerëz me stil e stof medemek institucional e konstitucional deri ca kohë më parë, pa u krijuar tamam regjimi iliberal, kur institucionet i sulmonte dikush tjetër, njëfarë robi me emrin Sali Berisha (iu thotë gjë ky emër?), dhe e bënte në mënyrën më brutale të mundshme? Si mund të dalin në mbrojtje të institucioneve ca njerëz që bënin sehir, kur Kryeprokurorja etiketohej “putanë”, kur Presidenti etiketohej “horr”, kur të parit të opozitës i thuhej “provoje dhe njëherë, dhe do ta shohësh se ç’do të të gjejë; si një bandit kam për të ndëshkuar”, kur të tre u shpallën arkitektët e organizatorët e një puçi fantomatik, kur iu tha “jo” shkresës së prokurorisë që urdhëronte ndalimin e gjashtë eprorëve të Gardës së Republikës, etj., etj? (a.n.)

Nano i plotë:

http://gazeta-shqip.com/lajme/2013/02/12/ta-mbrojme-apo-ta-d...