Mihal Luarasi jep versionin e tij dhe përgënjeshtron versionin e Todi Lubonjës lidhur me dëshminë e tij në gjyq

Në librin “Nën peshën e dhunës”, autori Todi Lubonja (vdekur në vitin 2005) përmend si një nga dëshmitarët në gjyqin e tij edhe Mihal Luarasin. Ky i fundit ka përfunduar gjithashtu në burg në po të njëjtën kohë e i akuzuar për të njëjtën gjë, dmth për futjen e frymës liberale në art e kulturë. Libri i Lubonjës është publikuar qysh në fillim të viteve ‘990, dhe në një intervistë për Mapon e sotme, Luarasi thotë se nuk e ka takuar më pas daljes në dritë të librit. “Më ka lënduar me shpërfilljen që ka treguar për mua në libër”, thotë ai duke paralajmëruar publikimin së afërmi të një libri autobiografik, në të cilin, siç mund të merret me mend, jep dhe versionin e tij lidhur me ngjarjen e rrëfyer prej Todit. ”Kemi qenë miq, kemi ndarë të mira e të këqija, tronditje e goditje nga diktatura”, pohon ai, duke mos e fshehur pezmatimin që i ka shkaktuar libri “Nën peshën e dhunës”. Në librin e tij me titull “Korbi korbit nuk ia nxjerr sytë”, Luarasi nuk mohon gjërat që janë thënë në adresë të tij, por thjesht i kualifikon ndryshe ato, dmth jo si dëshmi dashakeqe, por si dëshmi dashamire.

Pyetjes së Aida Tucit, që e ka intervistuar, se “cila është arsyeja e sulmit që Lubonja i ka bërë atij”, Luarasi i përgjigjet: “Është ringjitja magjike e bukës së thyer me mentorin e tij, Ramis Alinë”. Por nuk shpjegohet se në ç’mënyrë kjo ringjitje e bukës së vjetër lidhet me denoncimin që Todi i bën atij në librin e vitit 1994.

Intervistën e plotë, tok me një fragment nga libri, mund ta ndiqni në linkun http://www.mapo.al/2013/02/11/mihal-luarasi-e-verteta-e-deshmise-sime-ne-gjyqin-e-todi-lubonjes/

Re.Pu.