Rama përballë "sloganit të fshehur të PD" dhe një "kategorizim analistësh politikë"

Andi Bushati në një editorial në TemA disa ditë më parë fliste për "slloganin e fshehur të PD-së" dhe shkruante:

"Për vite me radhë opozita socialiste ka denoncuar krimet dhe aferat korruptive të qeverisë dhe familjes Berisha, dhe po për vite me radhë, qeveria dhe familja Berisha janë kundërpërgjigjur me sulme personale kundër antarëve të opozitës dhe në vecanti kundër liderit Edi Rama. Dhe një pjesë e mirë e medias dhe analistëve i kanë etiketuar këto sulme si sulme politike që tregojnë se palët janë njëlloj “të ndotura” politikisht. Dhe ky perceptim tashmë duket se në media ka marrë trajtat e një të vërtete absolute të cilën analistët dhe “intelektualët” e shqiptojnë si papagajë pa pasur nevojën që të aktivizojnë të menduarin kritik për të zbuluar të vërtetën që fshihet pas këtij perceptimi. Këtë perceptim unë e konsideroj jo thjesht të rremë dhe të krijuar nga naiviteti dhe injoranca, por ai është një perceptim i fabrikuar, tejet dashakeqës, dhe i mbushur brenda me djallëzi dhe maskarallëk. Po përvijohet si qëndrimi i fushatës së ardhshme elektorale: “as ata nuk janë më të mirë”. Sado e pamoralshme që të duket, sado sport me goditje nën brez që të ngjajë, kjo lloj fushate e kamufluar, e fshehur nën paradën e “sukseseve” … ka gjasë të jetë e suksesshme. Duhet që vetë Rama të dëshmojë se nuk është peng i klientëve më të errët të Berishës…."

Bledar Prifti që shkruan nga SHBA replikon sot në DITA:

"Bushati në mënyrën më absurde dhe të pallogjikshme e mbyll shkrimin duke u shprehur se tani meqënëse Berisha ka këtë strategji, barra i ngelet Ramës të na tregojë se nuk është ashtu sic thotë Berisha (!). Nëse ju si analistw akoma pas gjithë këtyre viteve dhe marrive të pushtetit nuk keni kuptuar vetw se kush është Berisha dhe kush Rama, atëherë më lejoni t’ju vë në dukje se llogjika juaj e të vlerësuarit dhe të menduarit është shumë më e varfër dhe shumë më pak e sofistikuar se ajo e një qytetari të thjeshtë. Kur nuk e keni kuptuar për vite me radhë, nuk do mund ta kuptoni për punë muajsh…"

Prifti më pas bën një "kategorizim" të medias dhe analistëve politikë dhe shkruan ndër të tjera:

"Së pari, një grupim jo i vogwl i medias dhe analistëve janë të lidhur ngushtë me pushtetin dhe e promovojnë me vetwdije këtë strategji të Berishës. Këta media dhe analistë të pushtetit marrin fonde buxhetore dhe honorare shumë të majme. Në këtë konteks, është normale që të veprojnë si pjesë dhe zgjatime të pushtetit për të promovuar strategjitë e tij.. Në grupin e dytë janë ato/ata media dhe analistë që pavarësisht se janë kundër pushtetit Berisha-Meta, janë gjithashtu ideologjikisht dhe në mënyrë të pakonceptueshme edhe kundër opozitës. Duke u përpjekur të zbukurojnë vetullat, padashje vetënxjerrin sytë duke e barazuar opozitën me pushtetin… Në grupimin e tretë mund të fusim ata/ato analistë egoistë të cilët edhe pse nuk kanë lidhje direkt me pushtetin, janë shërbëtorët më të zellshëm (në shumicë edhe të pavetëdijshëm) të tij. Përpiqen të duken si të pavarur edhe kur realiteti nuk kërkon pavarësi por zbulimin e së vërtetës. Nëse për të vërtetën apo të drejtën e një cështje politike Berisha thotë “jo” kurse Rama thotë “po”, këta analistë japin vërdiktin e tyre egoist se e drejta apo e vërteta është “pjo”.  Egoizmi i gërshetuar me megallomaninë i shndërron ata/ato në shërbëtorët jo vetëm më të vullnetshëm por madje edhe më rezultativë të pushtetit…" (a.th.)

Bushati: http://www.gazetatema.net/web/2013/01/22/slogani-i-fshehur-i...

Prifti: http://gazetadita.al/strategjia-e-berishes-si-recete-shkater...