Kuqezinjtë drejt antikorrupsionit

“Takimi me kreun e AK-së është në vazhdën e bisedave të mëparshme. Folëm për zgjedhjet dhe për platformën e Aleancës Kuq e Zi për zgjedhjet e 23 qershorit. Nxita Spahiun që në platformën e tyre të evitojnë rrëshqitjet në nacionalizëm. Patriotizmi është gjë e mirë, por nuk duhet të rrëshqasë në nacionalizëm. Nacionalizmi do të dëmtonte rolin e mirë të Shqipërisë si një faktor stabiliteti në rajon”

Eshtë deklarata e ambasadorit Arvizu pas një takimi sot paradite me Kreshnik Spahiun. Ky i fundit, në komentet mbi takimin citohet të thotë ndër të tjera:

“Shqipëria është në prag të zgjedhjeve më vendimtare për shqiptarët.. AK tashmë do ta prezantoja programin dhe platformën e saj të orientuar në një luftë pa kopmpromis kundër korrupsionit, kundër krimit të organizuar, pastrimit të parave, për ta nxjerrë për të parën herë nga harta e zezë Shqipërinë, si një nga vendet më të korruptuar në të gjithë Europën... AK ka kërkuar mbështetjen e opinionit publik dhe ndërkombëtar për vendosjen e standardeve të demokracisë dhe zbatimit të ligjit, ashtu siç SHBA ndryshojnë drejtuesit e tyre, ne kemi vendosur të vendosim me ligj kufizimin e mandateve të lidershipit politik shqiptar, jo më shume se 2 mandate duke filluar nga kryetarët e Komunave, kryetarët e Bashkive, Minibashkive, Kryeministri, kryetarët e partive, me qëllim që partia të mos jetë një precedent negativ ku lidershipi politik në Shqipëri të tentojë të jetë i përjetshëm. Shqipëria duhet të jetë një model tjetër, një model evropian me standarde amerikane... Për Aleancën Kuq e Zi SHBA është partner dhe udhërrëfyes". - A.N.