Punonjës të Ministrisë së Brendshme kanë shkëputur gjendjen e tyre civile nga Tirana dhe janë regjistruar në... Topojan e Shishtavec

Nënkryetari i KQZ-së Denar Biba në një intervistë për televizionin Top Channel ka shpjeguar pse përfaqesuesit e opozitës në KQZ kanë riprozuar ndarjen e mandateve, sipas projektit të mëhershëm të KQZ (ku Kukësit i mbetet mandati i katërt). Shtypi i sotë fliste për "tërheqje të përfaqësuesve të opozitës" por Biba thotë se nuk ka asnje terheqje, por vetëm tani anëtarëve të KQZ iu eshte vene ne dispozicion (nga dy audituesit pranë Gjendjes Civile) sqarimi për lëvizjet fiktive të popullsisë në Kukes, rritja e se ciles i dha ketij qarku te drejten te mbaje deputetin e katert.
Citohet Biba: "Del qartësisht që lëvizja ka qenë e manipuluar drejt Kukësit. Qytetarë të Tiranë, kryesisht punonjës të Ministrisë së Brendshme, janë të detyruar të shkëpusin gjendjen e tyre civile nga Tirana dhe të regjistrohen në Topojan apo Shishtavec, në mënyrë të palogjikshme, por ligjore. Formalisht këta njerëz janë regjistruar dhe kanë një certifikatë nga komuna Topojan apo Shishtavec, moralisht kjo është një lëvizje e dënueshme. Këtu mund të ketë nevojë për hetim më të thelluar, por jo nga KQZ-ja".
Dje, Komisioni i Ligjeve miratoi aktin sipas te cilit i propozon Kuvendit te lere ne fuqi ndarjen e mandateve sipas vitit 2009. Biba ve ne dukje gjatë intervistës edhe pasojen e rrezikshme qe do te vije sipas tij, nese nuk behet një rindarje e re e mandateve por ngelet kjo e 2009-s. "Në rast se do të ndodhë ashtu, atëherë nesër, pasnesër në përfundim të zgjedhjeve, cilido që të jetë fituesi i tyre, do të mjaftonte çdolloj subjekti që të shkonte në Gjykatën Kushtetuese dhe me një garanci shumë të lartë, Gjykata Kushtetuese do të shpallte të pavlefshme zgjedhjet dhe do të detyronte ripërsëritjen e tyre" A.N.