"E kanë konstatuar specialistët" dhe "do vendosin specialistët"

E perditshmja MAPO citon Drejtorin e Muzeut Historik, Luan Malltezi të flasë për "një dëmtim të konstatuar mëngjesin e së hënës në Mozaikun e Muzeut që dominon qendrën e Tiranës dhe sipas Malltezit "ka ardhur momenti që specialistët të ulen e të diskutojnë për fatin e tij".

Citohet Malltezi në këtë gazetë: “Mozaiku ka vite që është në gjendje të keqe. Janë konstatuar problemet dhe dihet që dëmtimi është tërësor, çka e kanë deklaruar edhe specialistët që e kanë parë nga afër. Në këto rrethana duhet të mblidhen specialistët për të diskutuar nëse duhet të riparojmë mozaikun, i cili nuk garanton jetëgjatësinë, e të shpenzojmë fonde për një mozaik të kësaj natyre, apo duhet të mendojmë të bëjmë diçka më përfaqësuese në Muzeun Kombëtar, me frymën e kohës”.

Pra "e kanë konstatuar specialistët" dhe "do vendosin specialistët". Vecse duket krejt ngjashëm me marifetet e zakonshme të lënies drejt degradimit me dashje (si Piramida psh). Dhe në fakt, Malltezi thjesht është rikthyer (nga një 'rrugicë' tjetër) tek teza që paraardhësi i tij, Beqir Meta deklaroi në 2008, kur ndezi një debat të gjerë publik mbi idenë e zhvendosjes së mozaikut nga fasada e Muzeut Historik si 'dëshmi e komunizmit'. Ca kohë Mozaiku u "mbështoll" madje me një beze ku qe shkruar një nderim për Nënë Terezën, po ku fotoja dhe emri i bamirëses dilte në sfond prej një "Sali Berishe" të shkruar me gërma kapitale avdallësh militues.  (a.thano)