Shënim: Dy krahasime që Berisha nuk i ka bërë…

Shitjet me pakicë janë objektivi final i një ekonomie tregu – bizneset nuk i prodhojnë (ose importojnë) produktet e tyre thjesht për t’i mbajtur në magazina; ata synojnë t’ua shesin konsumatorëve në rrjetin e tregëtisë me pakicë.

Sipas INSTAT-it, në qershor 2009, indeksi i vëllimit të tregëtisë me pakicë arriti nivelin 192.9%, kundrejt vitit bazë (2005=100%). Pra, i bie që vëllimi i tregëtisë me pakicë pothuaj të jetë dyfishuar gjatë 4 vjetëve të para të qeverisjes së Berishës. Por ai nuk e bëri këtë krahasim në fushatën e atëhershme zgjedhore, kur, në fakt, duhej ta bënte, sepse ishte treguesi më domethënës e i prekshëm i rritjes ekonomike…

Le të vijmë në qershorin e 2012-ës. Berisha përsëri nuk foli për indeksin e vëllimit të tregëtisë me pakicë, por kësaj rradhe, me arsye… Vëllimi i tregëtisë me pakicë, sipas INSTAT-it (i cili ka kaluar tani nën kontroll të drejtpërdrejtë të Kryeministrit), u ul plot 12.2% krahasimisht me 3 vjet me pare – indeksi arriti në nivelin 169.3, nga 192.9 që kishte qenë në të njëjtin muaj të vitit 2009. Dhe në vend që të flasë për këtë rënie të ndjeshme të konsumit gjatë mandatit të tij të dytë qeverisës, Berisha flet për Shqipërinë si vend i katërt në botë për përkthim të rritjes ekonomike në mirqënie për shtetasit…
E.Zaloshnja

Faqja me të dhënat e INSTAT-it: http://www.instat.gov.al/media/178653/tregtia_me_pakice_trem...