“Baraba” dhe “Barjaba”, ose dallimi me PD e PS

Partia Socialiste ka shpërndarë dje një deklaratë për çështjen Barjaba, me të cilën tenton t’i vërë fre përdorimit të shproporcionuar të këtij rasti nga politika. Sipas deklaratës së PS “Provat dhe faktet e përditshme që opozita po publikon, duke filluar nga vetë të ardhurat marramendëse të familjes së kryeministrit, e kanë bërë edhe më të dëshpëruar reagimin e tij. Së fundi kryeministri është kapur pas rastit të Kosta Barjabës si i mbyturi pas fijes së barit. Njerëzit e dëshpëruar bëjnë veprime të dëshpëruara”

P.S. thotë në deklaratë se rasti i Kosta Barjabës shërben për të theksuar edhe njëherë ndryshimin e madh mes PD e PS. “PS në opozitë, ka reaguar menjëherë ndaj lajmit për gjestin e papranueshëm të cenimit nga ana e Kosta Barjabës të një pasurie private prej 238 dollarësh, duke deklaruar ndërprerjen e bashkëpunimit me të. Ndërsa PD në pushtet, është bërë streha mbrojtëse e një ujqërie politike që mban përgjegjësi për cenimin e një pasurie kombëtare e publike në rendin e miliarda eurove. Dhe vetë kryeministri që nuk provon dot para publikut as pastërtinë e burimeve të fitimit vjetor përrallor të familjes së tij, është bërë si hajduti biblik Baraba në krye të qeverisë”, theksohet në deklaratën e PS, të pasqyruar nga Shqip.

“Më kot Barabai kryeministër ëndërron të shpëtojë përmes kryqëzimit të opozitës, duke munduar ta qorrojë popullin me baltën e shpifjeve e të akuzave ndaj nesh. Më 23 qershor shqiptarët do ta ndëshkojnë masivisht me votë Partinë e Barabait kryeministër dhe do të hapin rrugën e një Rilindjeje Shqiptare me Edi Ramën e Partinë Socialiste”, përfundon deklarata e PS-së. Ja.Se.