1.5 milionë vizitorë kanë vizituar armët e Skënderbeut? Pra, nga dera kanë hyrë 80 vetë çdo 60 sekonda!!!

Ekspozita e armëve dhe përkrenares mit të heroit tonë kombëtar, për mëse 1 muaj u shndërrua në vend peligrinazhi sepse shqiptarët mundën për herë të parë t’i shihnin në mjediset e Muzeut Historik Kombëtar. Kur kanë mbetur vetëm pak ditë nga mbyllja e ekspozitës së çelur më 22 nëntor, muzeologu Fredi Gusho thotë se janë rreth 1 milionë e gjysmë vizitorët që kanë parë ekspozitën, raporton Koha Ditore.

“Sidomos fluks i madh qe në ditët e festimeve të 28 Nëntorit. Numri i vizitorëve nga 700 deri në 800 mijë veta. Vazhdojnë të vijnë akoma njerëz edhe tani për Vitin e Ri, nga ardhja e emigrantëve pati shumë fluks”, thotë muzeologu Fredi Gusho. 

Sipas këtyre të dhënave, i bie që nga 22 nëntori, më 30 dhjetor (duke i quajtur të tëra ditë pune, pa pushime) të kenë hyrë 40 mijë në ditë (!!!)

Në një ditë 8-orëshe, i bie 80 vizitorë në minutë (që nuk do i nxinte as dera). Këta, duan ca që ta vizitojnë ekspozitën, nuk është se fusin vetëm kokën e ikin. Dhe lind pyetja a kanë arritur ti shohin vërtet armët? Sepse në 1 orë, brenda duhet të kishin hyrë 5 mijë veta në ekspozitë!

Por, e kotë të presim që dikush të mbajë përgjegjësi për informacionet e rreme të dhëna në deklarata prej pozicioni zyrtar. Përndryshe, të parët duhej të ishin ata që deklarojnë se kemi më shumë turistë sesa banorë, në verë. K.C.