Ndryshime në tekste të kërkuara nga Turqia? Ç'ne, na i ka kërkuar BE - gjen përgjigjen ministri kosovar

Ministri i Arsimit Shkencës dhe Teknologjisë i Kosovës, Ramë Buja ka mbajtur një konferencë për shtyp në Prishtinë me rastin e fundvitit, ku ndër të tjera është pyetur nga gazetarët e pranishëm edhe për ndryshimet në tekstet e historisë, të kërkuara vecanërisht nga Turqia.
Media e Prishtinës raporton se "i pyetur për tekstet e historisë, të cilat kanë filluar të ndryshohen me kërkesën e ministrit turk, Buja ka thënë se asnjë ministër nuk ka të drejtë të ndryshojë historinë".
Citohet Buja: “Historinë nuk mund ta ndryshojë asnjë ministër, çfarëdo përmase qoftë dhe çfarëdo shteti qoftë. Historia mbetet ajo që është dhe këto ndryshime që janë kërkuar janë komfor një kërkese të Komisionit Evropian, që nga viti 2004, kryesisht për vendet e Ballkanit, të ndryshojë për aq sa mundet gjuha e urrejtjes e shkruar në librat e historisë dhe në librat e tjera”. Re.Pu.