Shënim: 68-68-4 apo 70-66-4?

Partia Demokratike nuk ka shfrytëzuar të drejtën për të dorëzuar pranë Kolegjit Zgjedhor kërkesën ankimore, lidhur me caktimin e mandateve për deputet, në funksion të zgjedhjeve parlamentare të 23 qershorit. Në projektvendimin që nuk mundi të miratohej në Komisionin Qendror të Zgjedhjeve, parashikohej që për shkak të lëvizjeve demografike, Qarkut Tiranë dhe atij Durrës t'u shtohej nga një mandat, Qarkut Korçë dhe Berat t'u hiqej nga një mandat, ndërkohë që mbetej i pa ndryshuar numri i mandateve në Kukës. Mungesa e ankimimit ndaj mosvendimmarrjes së përcaktimit të mandateve për deputet në rang vendi, sipas PD-së, sjell mosndryshimin e ndarjes së mandateve. Pra, sipas PD-së, ndarja e mandateve do të jetë e njësoj si në zgjedhjet e fundit parlamentare, ato të vitit 2009.

Në ato zgjedhje, siç dihet, rezultati i mandateve ishte 70-66-4, përkatësisht për koalicionin e udhëhequr nga Berisha, Rama e Meta. Me shpërndarjen e re të mandateve dhe me votat e 2009-ës, rezultati do të ishte 68-68-4, përkatësisht për koalicionin e udhëhequr nga Berisha, Rama e Meta.  I njëjti rezultat do të ishte (68-68-4) edhe sikur mandati t’i hiqej Kukësit e të mos i hiqej Beratit, por në këtë skenar, koalicioni i Ramës ishte vetëm 500 vota larg marrjes së mandatit të 69-të.

Prandaj dhe përfaqësesi i PS në KQZ, Genc Gjonçaj, deklaroi se "Kolegji zgjedhor maksimalisht mund të orientojë dhe njëherë çështjen pranë KQZ, por nuk mund të shprehet për përmbajtjen. Do të jetë KQZ-ja që nëpërmjet transparencës, përgjigjes ndaj kërkesës së dy anëtarëve, do të realizojë dhe vendimin përfundimtar, atë të ndarjes së mandateve për t’ia kaluar më tej Kuvendit".

Por a do të votojë KQZ-ja për variantin 68-68-4, për të zëvendësuar variantin 70-66-4?

E.Zaloshnja