Si në përrallat e ’1001 netëve’...

Dëshmia e ekspertit mjeko-ligjor për vrasjen e demonstruesit Ziver Veizi, që për pak i ndryshoi gjithë rrjedhën procesit gjyqësor të “21 janarit” nuk do të merret parasysh nga gjykata. Vendimi është marrë në seancën e djeshme nga trupi gjykues i çështjes. Eksperti mjeko-ligjor në fjaë quhet Ndoc Çardaku.

Çardaku, një seancë më parë, para gjykatës deklaroi se Ziver Veizi është qëlluar nga një plumb rikoshet. Sipas tij, në këtë përfundim ka arritur pasi në fibrat e këmishës së viktimës janë gjendur mbetje mikroskopike druri, të cilat tregojnë se predha më parë ka hasur në një objekt të drunjtë, i cili mund të jetë dhe një nga pemët përpara godinës së Kryeministrisë.

Reagimi i prokurorit Blerim Tominaj: "Duke vlerësuar deklarimet dhe sqarimet e dhëna nga eksperti përkatës si të pavlefshme. Në pozicionin e tij si ekspert ka shkelur nenet për njohuritë e veçanta. Siç del dhe nga emërtimi i tij në aktin përkatës, është ekspert mjeko-ligjor, ndërsa përcaktimet e tij janë të fushës kriminalistike, kimike e biologjike. Eksperti ka shkelur edhe nenet për deklarimin para trupit gjykues të së vërtetës. Në mënyrë abuzive eksperti në fjalë përcaktoi se copat janë marrë nga predha, transportuar mbi të, tamam si në përrallat e ’1001 netëve’ dhe me një shpejtësi më e madhe se e zërit, pasi u ka rezistuar temperaturave mbi 1 mijë gradë celsius, ka depërtuar xhupin, trikon për të mbetur përfundimisht në fibrat e këmishës dhe për t’u zbuluar pikërisht aty nga eksperti në fjalë..."

Prokuroria kërkoi nga gjykata që kjo dëshmi të mos administrohet si provë, por të rikryhet ekspertim nga një tjetër ekspert. Gjykata vendosi të pranojë kërkesën e Prokurorisë. Të paktën... (A.N.)