Flamuri partiak i intimidon zgjedhësit?

Komisioni Qendror i Zgjedhjeve miratoi sot projekt-udhëzimin mbi ngritjen e qendrave të votimit për zgjedhjet politike të 23 qershorit 2013. Sipas dokumentit, qendrat e votimit krijohen në ndërtesa të institucioneve publike arsimore, kulturore dhe shëndetësore ku përfshihen: shkolla, çerdhe, kopshte, konvikte, qendra shëndetësore, qendra kulturore. Ndërkohë që ndalohet ngritja e qendrave të votimit në banesa private, ndërtesa që përdoren apo janë në pronësi të një partie politike, ose kanë shërbyer si zyra elektorale gjatë fushatës zgjedhore.

Por diskutimi mbi këtë projektvendim u shoqërua me debate mes anëtarëve të KQZ-së. Partia Socialiste kërkoi që godinat private, ku më herët janë vendosur simbolet partiake, të përjashtohen nga lista e objekteve që do të përdoren si qendra votimi. Por kërkesa u rrëzua me votë, pasi sipas kryetares së KQZ-së, Lefterie LLeshi Kodi është i qartë kur përcakton përjashtimet.

"Në çdo qendër votimi, flamuri i intimidon zgjedhësit, baneri sipër qendrës së votimit indimidon zgjedhësit. Këto janë elementë për të shmangur çdo lloj intimidimi", deklaroi përfaqësuesi i PS-së, Genc Gjonçaj. Një qëndrim i tillë u kundërshtua nga Lleshi. "Duke pasur parasysh edhe praktikën edhe vendimet e Kolegjit Zgjedhor, është një gjë që ka dalë gjatë procesit. Kështu që, mendoj se, konsensusi me ndryshimet e këtij Kodi ka zgjidhur edhe këtë problemin tënd mendoj", - citohet Lleshi. Re.Pu.