Tushja sapo kishte vendosur të firmoste padinë - thotë avokati i Gërdecit dhe përmend një krushqi mes Mediut dhe kryebashkiakut të Vorës

“Para pak kohësh erdhi e kërkoi edhe ajo të rreshtohej përkrah atyre familjeve që kërkonin drejtësi për tragjedinë e Gërdecit. Ajo kishte një arsye bindëse pse ishte vonuar më shumë se të tjerët sepse fundja kishte kaluar momente të vështira derisa kishte siguruar kujdestarinë e vajzës së vogël, mbesës së saj. Ajo ishte e duruar. Në momentin kur padia civile ishte përgatitur dhe pritej firma e Tushes, vjen lajmi makabër që ajo preferoi të ishte më afër Zotit se zyrave të ftohta dhe pa pikë shprese të shtetit shqiptar” – shkruan në një artikull të botuar sot në faqet e opinioneve në të përditshmen DITA, avokati i familjarëve të viktimave të Gërdecit, Dorian Matlija.  

Tushe dhe Kujtim Osmani, të dy të vetëvrarë ishin prindërit e njërën prej viktimave të Gërdecit, 18 vjeçares, Resmije Osmani. Av.Matlija rrëfen edhe disa detaje:

"I ati Kujtim, i cili u vetëhelmua, punonte në Bashkinë e Vorës dhe u pushua nga puna sepse kishte bërë krimin që mbështeste opozitën. E lanë pa asnjë të ardhur në pikën e varfërisë. E pushoi nga puna një person, një kryetar bashkie që sot thuhet se rastësisht ka lidhur krushqi me urdhëruesin e ndërtimit të punishtes kriminale të Gërdecit, me vetë ish Ministrin e Mbrojtjes. Kujtimi i mbetur pa asnjë zgjidhje u shty deri në pikën ekstreme, atë të vetëvrasjes. E dyta u largua Tushja, në të njëjtën mënyrë si bashkëshorti i saj. Ndjesë pastë. Vajza e vogël e Resmijes Kristiana 5 vjece sot (4 muajshe në ditën e shpërthimit) është jetime për herë të dytë, ndërsa familja Osmani është vrarë për herë të tretë. Fundvit, pragfesta dhe postfesta tipike të një vendi ku në vend të verës e rakisë, urimet po na ngjisin me pahir me gjakun e të pafajshmëve”. A.N.