Google ngjyros logon kuqezi për 100-vjetorin e Shqipërisë

Kush ka hapur Google nga Shqipëria tani pas orës 12.00 të natës, ka vënë re me kënaqësi që logoja e gjigandit internetik është bërë kuqezi. Ekipi i Google me sa duket i është përgjigjur pozitivisht një peticioni nga Shqipëria, që u bë e njohur si nismë disa ditë më parë dhe që kishte si ideator një të ri korçar të quajtur Klajdi Hëna. Peticioni i firmosur nga mbi 50 mijë shqiptarë kërkonte që në 28 nëntor logoja e Google të ngjyrosej me flamurin shqiptar.

“Google Doodle” janë ndryshimet argëtuese, befasuese e ndonjëherë spontane që i bëhen logove të Google-it për të kremtuar festat, përvjetoret apo jetët e artistëve e shkencëtarëve të mëdhenj. Ndryshimi mund të jetë lokal, ndoshta vetëm për Shqipërinë, por detajet mund të mësohen gjatë ditës së nesërme. A.N.