Drejtori i Ujësjellësit flet për “nxitje dashurie”. Dhe një letër në ResPublica: Po na faturohet edhe jashtëqitja!

Drejtori i Ujësjellës-Kanalizimeve të Tiranës, Sahit Dollapi gjatë fjalës hapëse në “Konferencën vjetore të 12-të të Sektorit të furnizimit me ujë dhe kanalizime” (në foto) - deklaroi sot se rëndësia e këtij takimi ka të bëjë me sensibilizimin për rëndësinë që duhet të ketë uji për njerëzimin, - shkruhet në agjensinë e lajmeve BalkanËeb.

Tha Dollapi sipas kësaj agjensie: “Ne nuk jemi magjistar dhe nuk mund t’i japim ujit ngjyrat kuq e zi, por jemi përpjekur të nxisim dashurinë. Delegatët do të trajtojnë temën me rëndësi jetike si të ruajmë burimet ujore për pirje, reduktimin e humbjes së ujit etj”.

Nuk kuptohet mirë nëse është ndonjë kunjë me aleancën kuqezi, aq më pak kuptohet çfarë do të thotë “të nxitësh dashurinë” në sektorin e ujit. Ndoshta duhet konsultuar fjalimi i plotë i drejtorit të UK.

Në Respublica ka ardhur sot një letër e nënshkruar Nazmi Qamili, Tiranë që ka të bëjë pikërisht me temën e ujit dhe që ngre pyetjen: “Po na faturohet edhe jashtëqitja?”. Shkruhet në letër:     

“Lexova me vëmendje një shkrim me titull “Tarifa e Pastrimit futet tek Fatura e ujit”. Do të doja të shfaqja edhe unë disa mendime. Edhe mua fatura e ujit për Janarin më ka ardhur  mjaft e kripur: plot 1600 lekë megjithëse në shtëpi jemi vetëm dy persona. Si konsumator kam shfrytëzuar 8 m3 ujë të pijshëm aq aq më është faturuar. Por… Ç’kuptim ka zëri “largim i ujit të përdorur” me shumën 6.4 m3 x 11 lekë, e barabartë kjo me 85% të sasisë së përgjitshme të ujit të konsumuar, tashmë të paguar një herë ?!? Kësaj i bie si të thuash “t’ia rishesim vetes ujin e përdorur me çmimin e dytë, por paratë t’i marrë Ujësjellësi”. Bukur besa! Sa për “largimin e ujit të përdorur, ai rrjedh vetiu, pa asnjë ndërhyrje në kanalet e ndërtuara dekada më parë dhe nuk kemi parë dhe nuk po shohim ndonjë investim të veçantë në këtë drejtim. E nëse nuk ka investime apo kosto shtesë për shtetin, atëherë përse, pra, po na faturohet edhe jashtëqitja me TVSH??  Nuk ka dyshim që për këto marifete është në dijeni të plotë qeveria, por bën sikur nuk shesh e sikur nuk dëgjon. Madje na tërhiqet vëmendja që fatura është TITULL EKZEKUTIV. Dhe ec e fol po deshe. A bëhet luftë me qeverinë? Profecia e atij Usta Destanit që i thoshte djalit “Eh, sa ka zanati”. Ka lëshuar rrënjë të thella tashmë dhe po ngrihet lart e më lart. Po deri ku kështu?? Ku do arrijë?...” (a.n.)