SMS-ja e Berishës sipas Majkos. Dhe Mustafa Gjinishi sipas Berishës (dhe Fevziut)

Deputeti socialist Pandeli Majko ka përmendur gjatë një bisede në emisionin “Opinion” në televizionin KLAN edhe disa mesazhe telefonike të shkëmbyera mes tij dhe kryeministrit Sali Berisha. Tha Majko:

“Më çoi mua mesazh, siç e ka zakon ai. Më tha që je në rolin e Mustafa Gjinishit. Se ai me këto kunja merret. Dhe unë i ktheva një përgjigje që i thashë se Mustafa Gjinishi ishte viktimë e pasionit të vet, mik i britanikëve dhe në qoftë se unë e marr shembull Doktorin ndonjëherë, është thjesht për mbijetesën politike dhe thjesht vetëm për këtë”.

Mustafa Gjinishi është përmendur shpesh nga Berisha në debatet e muajve të fundit për rishikimin e historisë, krahasimisht i lidhur (nuk kuptohet pse) thuajse cdo herë me Qemal Stafën. U shpreh Berisha disa javë më parë në mbledhjen e Komitetit Ndërministror për 100-vjetorin e pavarësisë:

"E vërteta e madhe historike është se shqiptarët kanë bërë luftën, para së gjithash e mbi të gjitha, të mbështetur në paundin e taksapaguesve britanikë. E vërteta është se ishte Britania e Madhe ajo që i armatosi luftëtarët e lirisë në Shqipëri.. Personat e parë të kontaktuar prej tyre janë vëllezërit Kryeziu, të cilët kanë një meritë historike. Vëllezërit Kryeziu u kërkuan aleatëve që të takojnë një tribun tjetër legjendar, siç ishte Abaz Kupi. Ishte Kokoshi, një tjetër, ishte Mustafa Gjinishi, i njohur atëherë si komunist. Pra, ishin këta që organizuan, ishin këta që sillnin të gjitha materialet ushtarake e propagandistike kundër pushtuesit. Ishte Zogu, që deklaroi nga Parisi: Luftë pushtuesit... Unë e kuptoj dhe kam respektin më të madh për Qemal Stafën, por nuk mund të jem kurrë dakord që një stadium, një gjimnaz, një bulevard të ketë vetëm emrin e tij. Kjo, zotërinj, është një disbalancë e madhe në histori. Se cila është merita për të pasur stadiumi emrin “Qemal Stafa” unë këtë e kam pasur të vështirë ta gjej. Dhe këto disbalanca duhet të ekuilibrohen".

Njëherazi me Berishën, gazetari i TV Klan Blendi Fevziu në të përditshmen "Panorama" në shkrimin "Kjo histori që kemi mësuar ne" shkruante:

"Qemal Stafa ra dëshmor. Edhe Mustafa Gjinishi ra dëshmor. Madje ra në luftë, ku kish dalë me vullnet dhe duke e njohur rrezikun. Të dy qenë themelues të Partisë Komuniste; të dy drejtues të lartë të saj. Madje, Gjinishi qe kthyer ne Shqipëri për të luftuar, po ashtu si Qemal Stafa që kish lënë studimet. Përse njëri ka gjithë këtë nderim e tjetri jo? Të dalë një historian dhe të argumentojë se përse Qemal Stafa duhet të ketë nga një rrugë dhe një lagje në çdo qytet të Shqipërisë..." (e ka fjalën për emrin). - A.N.