"Policia ka detyrë të mos i lejë të vrasin veten, por jo t'i vrasë vetë"

Në blogjet online gjen forume të shumta për grevën e urisë në Tiranë, madje shpesh niveli i angazhimit aty është më i lartë se në vetë shtypin e Tiranës. Migena Aleksi, mjeke dhe aktiviste e të drejtave të njeriut, e pyetur via-mail nga ResPublica për të drejtat e policisë dhe të drejtat e një grevisti urie, dhe si janë shembujt e protestave të tilla në botë, shkruan:

"Rregullat e një greve urie apo çdo lloj greve tjetër, i bëjnë vetë grevistët. Eshtë e drejta e çdo grevisti në çdo vend të botës (hyn tek të drejtat e njeriut) që të zgjedhë mënyrën e protestimit. Nëse duan lëngje e ilaçe, nuk ka polici që i ndalon, ndryshe i dërgon drejt vdekjes dhe merr përgjegjësinë penale për këtë. Sidomos në gjendjen e grevistëve të Tiranës pas 28 ditësh pa ushqim, heqja e lëngjeve është vrasje, i çon ne gjendje kome. Më mirë se kushdo, këtë e di kryeministri mjek. Edhe nëse vendosin të hanë ëmbëlsira, apo mish të pjekur, është e drejta e grevistëve. Çdo avancë e çdo policie në botë mbi këtë të drejtë është vepër penale. Policia ka detyrë të mos i lejë të vrasin veten, por jo t'i vrasë vetë". Re.Pu.