Viti 1978: Komunistët internuan familjen e Abdyl Frashërit 1 muaj para se eshtrat e rilindasit të varroseshin me pompozitet në Tiranë

Orhan Jegeni, djali i mbesës së Abdyl Frashërit (biri i vajzës së Mehmet Frashërit, vëllait të vogël të Frashërllinjve) rrëfen për Fatos Veliun e G.Shqiptare se familja e tij u internua më 1978, pak muaj para se eshtrat e Abdyl Frashërit të vinin nga Stambolli. Madje, në ditën e rivarrosjes së eshtrave që u bë në një ceremoni pompoze ata nuk u lejuan të merrnin pjesë.

80 vjeçari kujton se u internuan një muaj para ardhjes së eshtrave, në kohën që e ëma, Irfania ishte së bashku me vajzën e Samiut, Sanijen, asokohe plakë e që jetonte në Stamboll, ishin më të afërtat e mbetura nga linja e gjakut e e vëllezërve Frashëri. I biri i Sanijes, nipi i Samiut, ishte asokohe ambasador i Turqisë në Paris dhe ishte i vetmi që mori pjesë në ri-varrimin e eshtrave të Abdylit të vdekur në Stamboll më 1892. Qeveria komuniste e gënjeu atë duke i thënë që familja e mbesës tjetër të  Abdylit (Irfanes), në të vërtetë e internuar, “nuk gjendeshin aty”.

Eshtrat, ishin refuzuar disa herë nga qeveria turke pas presionit të krerëve të Ballit në ekzil në Turqi, të cilët argumentonin se përderisa komunistët kishin shpallur non-grata Mit’hat Frashërin, të birin e Abdylit, eksponent i Ballit, nuk mund të pretendonin për eshtrat e të atit. Ne.Su.