A kanë lindur tashmë "celula të Berishës" brenda policisë së shtetit ?

"Policia e Tiranës është vënë nën presion të përdoret politikisht kundër grevës, por duket se refuzon shërbëtorin politik dhe pranë çadrës së grevistëve gjen vetëm policë nga Tropoja, disa ish- gardistë të Berishës, që shkojnë aty për të terrorizuar mbështetësit dhe për të arrestuar koordinatorët. Rasti i Asllan Patriotit, të cilin e ndaluan pasi sipas tyre një italian e paska paguar për t’i gjetur makinën e vjedhur dhe më pas ky nuk ia ka kthyer paret, është jo vetëm i rëndë nga ana ligjore, por i frikshëm nga ana politike, pasi për të mbërritur tek ai ndalim, policisë i duhen struktura paralele politike që të hetojnë jo për shkak të një krimi, por për shkak të biografisë politike të një personi. Dhe kur mëson se Drejtori i Policisë së Tiranës është vetë një ish- i burgosur politik, që nuk do ta bënte kurrë këtë gjë, bindesh se brenda policisë kanë lindur celulat e Gestapo-s së Berishës, të cilat nuk merren me krimin, por me “kriminelin” që cakton Berisha si të tillë..."

Analiza është e Mero Bazes, shkëputur nga editoriali i përnatshëm i TemA-s së tij online dhe kjo pjesë ngre një shqetësim të hershëm por të përforcuar nga rasti i arrestimit të një prej kordinatorëve të grevës së urisë, që në kulmin e aktivizimit publik për grevën,  arrestohet  papritur me një akuzë të paqartë që thuhet se është konsumuar në qershor, por tani "është finalizuar nga policia". A kanë lindur vërtet celula të tilla brenda policisë?

Në fakt nuk është hera e parë që flitet për trajtime "speciale" brenda policisë për persona që i shkaktojnë dhimbje koke kryeministrit Sali Berisha. Pas 21 janarit në një raport konfidencial të Komitetit të Parandalimit të Torturës në Këshillin e Europës (i cili iu është dërguar autoriteteve shqiptare, policisë dhe drejtorisë së burgjeve) flitet për keqtrajtime fizike nga disa oficerë të policisë, vecanërisht në komisariatet 1, 2 dhe 4 dhe Drejtorinë e Përgjithshme, vecanërisht të zellshëm me të ndaluarit e 21 janarit.

Në raportin e KiE përshkruhet edhe një praktike sistematike;  "personat e arrestuar ishin të detyruar të kalonin përmes dy rreshta policësh, ndërsa rriheshin në mënyrë kolektive prej tyre. Disa persona pretendojnë se ishin sulmuar fizikisht nga shefi i komisariatit 2 në Tiranë". (A.N.)

Mbi raportin e KiE për post-21 janarin: http://www.top-channel.tv/artikull.php?id=210193

Në foto: Qentë e policise së Tiranës gjate nje aksioni pas nje alarmi per bombe  (LSA, maj 2012)