Vetëm 4 përqind e shqiptarëve zotërojnë depozita mbi 2.5 milionë lekë në banka

Raporti i fundit i “World Ultra Wealth” tregon se në Shqipëri janë 55 persona që zotërojnë një pasuri prej 7 miliardë dollarë. Sipas raportit, në këtë klasifikim janë përfshirë vetëm ata individë që kanë të paktën 30 milionë dollarë pasuri. Të dhënat tregojnë se pasuria e multimilionerëve shqiptarë nuk ka ndryshuar nga viti i kaluar pavarësisht krizës ekonomike botërore. Pra të pasurit kanë vazhduar të pasurohen, por nuk mund të thuhet kjo gjë për të tjerët.

Televizioni TCH raportoi sot një sondazh të Bankës Europiane për Rindërtim dhe Zhvillim, sipas të cilit kriza ekonomike ka prekur shumicën e familjeve shqiptare që në 2010. (rreth 60%). Kjo përqindje është më e lartë se vendet e rajonit, pavarësisht se Shqipëria raporton rritje ekonomike gjatë viteve të krizës. Pra hendeku mes shtresave ekonomike është shumë i madh.

TCH në kronikën në fjalë, jepte të dhëna për një raport të Agjensisë së Sigurimit të Depozitave, sipas të cilit, vetëm 4 përqind e shqiptarëve zotërojnë depozita me mbi 2 milion e 500 mijë lekë në banka.

Indikatorë të tjerë tregojnë se hendeku mes të pasurve dhe të varfërve vazhdon të rritet çdo ditë. Raporton TCH: Në një vëzhgim në argjendaritë e Tiranës vihet re së produktet më të shtrenjta vazhdojnë të shiten me të njëjtat ritme si para krizës ekonomike, ndërsa për produktet më të lira rënia e shitjeve është drastike.

Elementë të vështirësive për shumicën e popullsisë vihen re edhe në të dhënat se sa harxhuan shqiptarët për pushime këtë vit. Kryetari i Unionit të Operatorëve Turistikë tregon se një pakicë e kamur shtoi kërkesat për pushime ekzotike me kosto të lartë (Karaibe, Seishel apo Maldive)-  ndërsa shumica dërrmuese e shqiptarëve ulën periudhën e pushimeve në 1 javë nga 10 apo 15 ditë duke kërkuar oferta sa më të ulta. (A.N.)