Zv.ministri i Brendshëm.. Arben Ristani

Ish-kryetari i Komisionit Qendror të zgjedhjeve Arben Ristani është emëruar sot zv.ministër i brendshëm. Në një vendim të botuar në faqen zyrtare të Këshillit të Ministrave, thuhet se propozimi është bërë nga vetë Berisha: "Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave vendosi: Z. Arben Ristani emërohet zëvendësministër i Brendshëm. Ky vendim hyn në fuqi menjëherë" - lexohet në vendim.

Më 11 tetor në Kuvend, ditën e votimit të kryetarit dhe anëtarëve të rinj të KQZ, Berisha "garantoi" opozitën se Ristani do të qëndrojë krah tij politikisht.
“E falënderoj z Arben Ristani që me vendosmëri dhe civilitet përballoi vështirësitë e jashtëzakonshme të krijuara nga tensionet politike të pamerituara të adresuara ndaj tij. Garantoj Ristanin se është nder dhe kënaqësi të vazhdoj bashkëpunimin me të dhe të theksoj se ka pasur mirëkuptimin tim të plotë kur vendosi të mos kandidojë për KQZ për faktin se ishte i pari kryetar në histori që zgjidhej me konsensusin e të gjitha forcave politike. E falënderoj, mos u bëni merak ju, se ai do jete në krah tim, në të gjitha betejat e ardhshme dhe vende të rëndësishme..." (Re.Pu.)