Derrat e Gjergj Ndrecës ngordhën në përmbytjet e Shkodrës, - i përgjigjet vajza e Ndrecës, Berishës

"Është e vërtetë që familja ime ka pasur një fabrikë mielli në Laç. Kryeministri ka aluduar se ia ka dhënë qeveria? Unë këtë e rrëzoj poshtë, sepse ajo fabrikë është bërë me djersën e prindërve të mi, të cilët prej vitesh bënë punë më të rëndomta në Greqi për të mbledhur paratë. Babai vendosi që të gjitha kursimet t’i investonte në Shqipëri, por dështoi në këtë biznes. Më pas ne hapëm një fermë derrash, edhe këto me mundin e babait tim, nuk kemi marrë asgjë nga qeveria, por nga përmbytjet e Shkodrës derrat ngordhën"

E përditshmja SHQIP ka intervistuar vajzën e Gjergj Ndrecës, dhe ndër të tjera e ka pyetur për ato që kryeministri i vendit thotë për familjen Ndreca dhe të tjerët. Dhe vajza përgjigjet si më sipër, madje thotë edhe: "Unë do të hyj në grevë në vendin e babait tim, nëse nuk kthehet dot. Erdha t’u sjell mesazhin grevistëve, t’i takoj të gjithë, por nuk më lejuan".

Ajo e mbyll me një apel për bashkëmoshatarët e saj, duke i ftuar sot në orën 14:00, që të marshojnë përgjatë bulevardit nga sheshi i Piramidës drejt vendit ku po zhvillohet greva për të përkrahur të burgosurit politikë dhe për t’u solidarizuar me ta. Do ndodhë? - A.N.

Foto: Nga përmbytjet në Shkodër, janar 2010 (LSA)