Nga 'gruaja' e Totozanit te 'zoti' i Berishës - rikthehet ideja e ndërhyrjes në Himnin Kombëtar

Kryeministri i vendit, Sali Berisha ka kërkuar sot në mbledhjen e komitetit për 100 vjetorin e Pavarësisë ndryshimin e Himnit Kombëtar, duke shtuar në të strofën për Zotin (versioni i Asdrenit ku është bazuar Himni ka patur disa heqje dhe ndryshime gjatë viteve). Tha k/m Berisha:  “Apeli i shqiptarëve tek Zoti është apeli më i drejtë se Zoti dhe kombi janë një dhe të pandarë. Dashuria për kombin buron nga fryma e zotit, ndaj duhet të shihen modalitetet se si të kthehet kjo strofë. Himni duhet të kthehet në variantin e tij të plotë, siç e shkroi Aleksandër Drenova”.

"Se Zoti vetë e tha me gojë, që kombet shuhen përmbi dhe, por Shqiperia do të rrojë, për të për të luftojme ne”. Janë këto vargjet të cilave i referohet shefi i qeverisë. Televizioni TCH e raportoi lajmin shoqëruar me këtë koment: "...Kjo deklaratë e kreut të qeverise vjen në një moment delikat ndaj dhe duket më shumë një mënyre për të hequr vëmendjen, sesa është pjesë e një projekti real të Komitetit Ndëministror. Mbetet për t’u parë nëse ky projekt do të shkojë deri në fund duke i dhënë Shqiperise për 100-vjetorin e pavaresisë një tjetër himn kombëtar.."

Berisha bëhet kështu i dyti këtë vit që kërkon ndryshime në tekstin e Himnit, pas Avokatit të Popullit Igli Totozani që disa muaj më parë hodhi idenë e ndryshimit të një vargu në himn për të përfaqësuar në tekst barazinë gjinore. "Janë gjysma e kombit dhe kanë po aq merita sa edhe burrat në histori, - tha asokohe Totozani duke shkaktuar një valë debatesh publike të cilat do jetë kurioze të shihet nëse do përsëriten tani për idenë 'Berisha'. 'Përshtatje gjinore' e himnit është bërë vitet e fundit edhe në vende të tjerë të Europës. Disa vende kanë ndryshuar tekstin ose e kanë hequr atë duke lënë vetëm muzikën për shkak të ashpërsisë së fjalëve (zakonisht himnet janë "mesazhe" luftarake). - n.s.
 

Në foto: Tenori Kastriot Tusha, duke kënduar Himnin Kombëtar, gjatë ndeshjes miqesore të futbollit, Kosovë-Shqipëri për 2 vjetorin e pavarësisë së Kosovës, 17 Shkurt 2010