Nga Hillary Swank te Eliza Dushku: Kur artistët e aktorët interpretojnë keq role publike

E keni parë këto ditë aktoren e njohur Eliza Dushku, apo ndonjë shqiptar tjetër të suksesshëm, që të pozojnë buzagas me krerët e nomenklaturës sunduese në Tiranë, e të deklarojnë se “Shqipëria i ka kaluar shumë vende perëndimore me zhvillimin e saj!!!!” (kjo e fundit është deklaratë e fotografit Fadil Berisha)? Mos u jepni shumë peshë. Merrini në rastin më të mirë si njerëz që aq dinë, aq bëjnë, e në rastin më të keq si njerëz që paguhen për të recituar e aktruar në atë mënyrë.

Nuk janë të vetmit në këtë punë. Ka dhe kolegë të tyre nëpër botë, që çfarë s’bëjnë për ca pará, vizibilitet e protagonizëm më shumë. Pardje, aktorja e famshme italiane Ornella Muti ish në Grozny, Çeçeni, me ftesë të gangsterit politik të atjeshëm Ramzan Kadyrov. Madje, dhe vallzoi me të këtë të fundit në një mënyrë shumë “të nxehtë”.

Këtë gjë e bënë vjet (të ftuar po nga Kadyrov, kukulla e Putinit në republikën e Kaukazit) edhe aktorja amerikane Hillary Swank, aktori tjetër Jean Claude Van Damme, violinistja e famshme britanike Vanessa Mae, etj. Hillary Swank bëri një mea culpa faqe tërë botës më pas. “Sikur ta dija se çfarë fshihej pas asaj ftesë që më erdhi dhe pas asaj ngjarjeje, nuk do të kisha shkuar”, tha ajo. Por Ornella Mutti nuk e ka marrë për leksion këtë gjë. “Jam e lumtur që jam këtu në Grozny”, u shpreh italiania.

As Eliza Dushku nuk duket se ka ndërmend të kërkojë falje ndonjëherë për faktin që po pozon në krah të atyre që kanë urdhëruar, apo fshehur, ekzekutimin e katër shqiptarëve të pafajshëm më 21 janar 2011. Duket si vajzë që s’e ka merak përdorimin politik.

M.N.