Kadare vs Hoxha (N.), nxehtësia në media vazhdon e rritet

Në mediat e sotme, zë hapësirë të gjerë debati rreth Kadaresë. Thanas Mustaqi tek Shqiptarja.com sjell detaje të debatit të kohës mbi librin Dimri i Vetmisë së Madhe: “Meqenëse kryqëzata ndaj Kadaresë për romanin ‘Dimri i Vetmisë së Madhe’ u shtri deri në një forum partie ku ishte vetë i pranishëm, Enver Hoxha u detyrua të thoshte se : ’Partia duhet të jetë përherë e matur, në mënyrë që çdo gjë ta gjykojë drejt e me objektivitet. Kështu duhet ta gjykojmë ne edhe shokun Ismail Kadare si shkrimtar, si dhe veprën e tij të kohëve të fundit.’ Në materialin e mbledhjes së asaj kohe, që ruhet nga arkivi i shtetit ndër të tjera, Enveri thotë: “armiqve tanë revizionistë u intereson shumë dhe dëshirojnë që ky roman, që demaskon qendrimet e tyre, të hiqet nga qarkullimi, dhe ca më mirë u intereson që të jemi ne ata që të themi nuk bën e ta hedhim në ujë. (...) Unë mendoj se ka vend për t’i bërë kritikë romanit, por këto duhet të jenë të tilla që të mos e thyejnë autorin, t’i bëhen në mënyrë shoqërore që ta ndihmojnë për ta përpunua më mirë në botimin e ri.”

Te Shqiptarja.Com, Sadik Bejko shprehet se ngjan sikur po inskenohet një fushatë kundër Ismail Kadaresë. Në çdo vend marrja e çmimit Nobel është një eveniment, dhe ato vende e shndërrojnë në aksionin më të madh në marrëdhëniet me jashtë për të promovuar kandidaturat e tyre. Por Bejkos i duket se këtu ndodh e kundërta, kur afron ajo kohë ndizet fushata anti-Kadare. Ai kujton se në Priston, një nga Universitetet më në zë të Amerikës Kadareja është medetyrim në kurrikulën e letërsisë. “Ky është raporti që ka Kadare me përjetësinë dhe ajo që ka jetuar në diktaturë është një incident, një aksident i jetës së tij. Është mendjeshkurtësi t’i bësh gjyq një shkrimtari kur duhej të ishim duke i bërë gjyq diktaturës!”

k.c.