Lesi, letër për Topallin: Po të jem unë i korruptuar, është edhe Aldo Bumçi

Nikollë Lesi ka shkruar një letër të hapur që gjendet e botuar në disa faqe online dhe që nesër pritet të botohet nga shtypi i ditës. Shkruan se i ka bërë shumë përshtypje negative intervista e kryetares së Kuvendit, Topalli në emisionin e gazetarit Ilir Babaramo ku ndër të tjera, e pyetur për nivelin e korrupsionit në Shqipëri, ajo ishte shprehur se ka korrupsion, porse niveli më i lartë i hierarkisë së korrupsionit është zv/ministri.

Shkruan Lesi: “Ndjehem i fyer si shumica e kolegëve me të cilët u takova e fola në telefon këto dy ditë. Më duhet të sqaroj se nëse një zv/ministër vjedh apo shkel ligjin për korrupsion, ajo nuk mund të ndodhë kurrsesi pa lejen apo bashkëpunimin me ministrin përkatës. Në mënyrë kategorike e them që nuk mundet pa bashkëpunim, pasi u bënë tre vjet, pa pak ditë, që jam zv/ministër dhe besoj se e njoh mire si funksionon shteti në gjithë piramidën e tij. Mund të ndodhë, siç edhe ndodh, që vetë ministri, edhe pa zv/ministrin t’i bëjë punët siç do, edhe në sensin e korrupsionit, porse kurrë nuk ndodh e kundërta, që zv/ministri të bëjë një veprim pa lejen apo firmën e ministrit. Unë nuk jam Jozi që të them: “me 100 përqind”. Ajo nëse pohon se ka fakte se ka zv/ministra të korruptuar, duhet të thotë edhe emrin e ministrit përkatës, ndryshe është një spekulim politik për të thënë se “ministrat janë të ndershëm e zv/ministrat, edhe hajdutë!”. E për ta konkretizuar më saktë për publikun po e marr edhe më afër vetes akuzën e saj, të thënë në përgjithësi; nëse unë jam i korruptuar si zv/ministër, atëherë pa asnjë dyshim është edhe ministri Aldo Bumçi! Kështu është ligji... Prape po rikthehem tek shprehja apo bindja e zonjës Topalli. Nëse është lapsus, ajo të kërkojë falje publike, nëse është bindje, është edhe më keq për të e për subjektin e saj politik...”

Lesi e mbyll me: “Ministri operon pa firmën e kryeministrit, kurse zv/ministri nuk mundet kurrsesi pa autorizimin me shkrim të ministrit. E kam fjalën për firma që sjellin lekë apo edhe euro korrupsioni!”
(A.N.)