Kushtëzimi i statusit me zgjedhjet? “Fitorja më e madhe e opozitës” – thotë Balla: Të gjithë e dimë se çfarë bëri Beni, Toma e Sasha...

“Deklarimi thuajse zyrtar nga BE-ja se Shqipërisë do t’i rekomandohet statusi, por vetëm pas mbajtjes së zgjedhjeve të lira e të ndershme, e të certifikuara si të tilla, vitin e ardhshëm, është një lajm i jashtëzakonshëm... Por njeriu që duhet të ndihet më mirë nga të gjithë është Edi Rama, megjithëse unë dyshoj se është kështu, - shkruan në një opinion në numrin e sotëm të së përditshmes MAPO, Sokol Balla.

Kushtëzimi i statusit me ecurinë e zgjedhjeve të 2013-s është për Ballën, fitorja më e madhe dhe më e rëndësishme e opozitës në Shqipëri, sepse (argumenton ai) “kauza që nisi si e Edi Ramës, pastaj e Opozitës, tashmë është përcaktuar si kauza e shqiptarëve, të cilët të nesërmen e zgjedhjeve të 2013-s do të përshëndesin fituesit që do të jenë edhe firmëtarët e kandidimit të Shqipërisë në BE, ose në heshtje do të shohin lakuriq para kamerave fajtorin e mbylljes së kësaj dere...”.

Balla, artikujt e të cilit, janë shpesh kritikë me Edi Ramën, e quan atë që ndodhi pas daljes së rezultatit fitues për Ramën në zgjedhjet e fundit lokale në Tiranë si “vjedhjen më spektakolare të zgjedhjeve ndonjëherë në rajon e ish-vendet komuniste” por shton se Rama “mori një ndëshkim në heshtje nga ndërkombëtarët”.

Shkruan Balla: “Ditët dhe javët që pasuan zgjedhjet për Bashkinë e Tiranës... si në një striptease në replay, zhveshën edhe dyshimin më të vogël se kauza e zgjedhjeve të vitit 2009 ishte një broçkull e opozitës. Ra miti i mungesës së fakteve, se faktet jo vetëm ishin brenda kutive, por ato u morën dhe u futën në kuti të tjera, duke përmbysur gjallë para kamerave dhe një kombi me frymën pezull, rezultatin për Bashkinë e Tiranës. Vetëm që të fitonte Luli e vetëm që të ndëshkohej Rama, doktori realizoi publikisht gjithë ato për të cilën akuzohej, por shpesh pa fakte dhe në emër të miteve urbane, 20 vitet e fundit.. Të gjithë e dimë se çfarë bëri Beni, Toma e Sasha ato javë. Me reagimin e të hënës, me sa duket, këtë e di edhe Brukseli...” - A.N.

Më shumë në:
http://www.mapo.al/2012/09/26/nje-fitore-e-opozites/