Zhvillim i papritur në gjyqin e “Dimrit...” E veja e diktatorit nxjerr 3 letra private për të provuar “Kadarenë tjetër”

“Shkrimtari Ismail Kadare, nuk ka qenë aspak i detyruar apo nën presion nga Nexhmije Hoxha për dorëshkrimin origjinal të romanit “Dimri i vetmisë së madhe”. – Kjo është njëra nga fjalitë që ka përdorur - në seancën e sotme gjyqësore në Tiranë mes shkrimtarit të njohur Kadare dhe të vesë së diktatorit Nexhmije Hoxha - avokati i kësaj të fundit Aranit Roshi.

Dhe pikërisht në këtë moment ka ardhur ajo që mund të konsiderohet “e papritura” e këtij procesi. Në përpjekje për të provuar se marrëdhëniet Hoxha-Kadare kanë qenë të ngrohta dhe miqësore, avokati i ka dorëzuar në dorë gjykatësit Bledar Abdullai, disa letra të shkruara me shkrim dore.

Në njërën nga letrat Kadare i kërkon të takohen (“unë dhe Elena kemi shumë dëshire t’ju bënim një vizitë nëqoftëse ju do të kishit kohë të lirë..”), në një letër tjetër pas kthimit nga një vizitë në Suedi, kërkon sërish takim (jam i gatshëm t’ju bisedoj për disa probleme dhe përshtypje nga vendet skandinave, siç më thatë në Kongres) etj. Letrat në fjalë janë letra private që Kadare i ka dërguar Nexhmije Hoxhës në fillimin e viteve '70. Në një prej tyre ka një lutje për një apartament me studio dhe telashet ku e kanë futur të tjerë që e synojnë atë. Detaje nga përmbajtja e letrave pritet të bëhen publike në shtypin e ditës.

“Në këto letra, - sipas avokatit, - duket qartë që z.Kadare dhe znj.Hoxha kanë patur raporte miqësore, jo raporte detyruese dhe në një prej tyre madje z.Kadare e falënderon me shumë përzemërsi znj.Hoxha edhe për ndihmën që i ka dhënë për romanin dhe mbrojtjen e tij nga “sulmet e disa qarqeve politike”. Jemi para faktit se dhurimi i dorëshkrimit nga Ismail Kadare dhe pranimi i kësaj dhurate nga Nexhmije Hoxha, ka ndodhur 35 vjet më parë më 17 tetor 1975, në zyrën e palës së paditur, në shenjë mirënjohje të dhuruesit ndaj pranueses”. Kurse avokatja që mbron shkrimtarin tha se kjo është një përpjekje për t'ju shmangur thelbit të gjyqit. - A.N.