Të godasësh (qoftë edhe me miell) një si Berisha në një vend si Shqipëria nuk ndodh përditë... Apo ndodh?

Gjatë ditës së djeshme prekëm në një shënim të shkurtër këtu në ResPublica sjelljen e medias me lajmin e goditjes me qese mielli të makinës së Berishës nga një grup ish-të përndjekurish politikë. Pak a shumë ishte edhe një si parashikim për mënyrën si  do ta trajtonin lajmin sot, sepse akti i djeshëm ishte edhe një lloj testi për të përditshmet e Tiranës. Të godasësh (qoftë edhe me miell) një kryeministër si Berisha në një vend si Shqipëria nuk është një gjë që ndodh përditë apo jo? Është e vërtetë që lajmi u sfumua paksa në mbrëmje nga ngjarja e rëndë në Shijak, por gjithsesi, faqet e para dhe mënyrat e editimit lejojnë hapësira të ndryshme për të vënë në pah njërin apo tjetrin lajm të ditës. Dhe çfarë shohim sot në faqet e para të gazetave?

Interesante është që ato që konsiderohen si dy të përditshmet kryesore në vend Panorama dhe Shekulli e kanë shmangur lajmin nga dy-tri titujt kryesorë të faqes së parë. Ish-opozitarja "Shekulli" e ka klasifikuar në një kutizë me ngjyra të ndezura në cepin e djathtë të kopertinës. Edhe "Panorama" e ka parë të udhës t'i japë një cep në të djathtë, po ashtu edhe gazeta tjetër e të njëtit grup mediatik, "Gazeta Shqiptare". Për "MAPO"-n 'nuk ka qenë' fare lajm për faqe të parë, e po ashtu edhe për disa të përditshme të tjera.

Vetëm në faqet e para të gazetave "Shqip", "Shqiptarja.Com" dhe "Tema" lajmi kishte marrë hapësirën kryesore pas lajmit të vrasjes së komisarit të Shijakut. - A.N.

Në foto: Disa reporterë pranë miellit të mbetur në rrugë nga mielli i hedhur nga ish- i burgosuri politik Agim Kollçaku mbi makinën e kryeministrit Sali Berisha dje në hyrje të parlamentit. (LSA)