“Rama është i ngratë,” tha Berisha. Po Berisha vetë, ç’është?

“Shitjet janë rritur me 25,6% këtë vit, krahasuar me vitin e kaluar” tha Berisha sot në mbledhjen e qeverisë, duke vazhduar me këtë xhevahir të teorisë ekonomike: “Tregtia është edhe gjaku i ekonomisë. Duhet të dini një gjë, se për njeriun nuk ka gjë më jetike se qarkullimi i gjakut, shpejtësia e këtij qarkullimi, pra tregtia njeh një rritje edhe mbi parashikimet. Kjo rritje e dëshmon para së gjithash një rritje të fuqisë blerëse në këtë vend. Unë mund t’ju them shqiptarëve se nuk ka asgjë më të sigurt se ajo që deklarojnë vetë shitësit, ata mund t’i zvogëlojnë shitjet por kurrë t’i rrisin”.

Por ç’thotë INSTAT-i i Berishës? Thotë të kundërtën e shefit të vet...

Po të vizitoni faqen e internetit të INSTAT-it (http://www.instat.gov.al/) dhe të klikoni në fund të saj në nëntitullin “Tregtia me pakicë” do të përballeni që në fillim me këtë fjali: “Indeksi i volumit të shitjeve në tregtinë me pakicë në  tremujorin e dytë  2012 arriti 162.6, kundrejt vitit bazë (2005=100). Krahasuar me të njëjtën periudhë të vitit paraardhës, indeksi i volumit të shitjeve në tregtinë me pakicë është ULUR 1.2%” Pra, nga e gjeti Berisha rritjen e shitjeve “me 25,6% këtë vit, krahasuar me vitin e kaluar”???

Gjithashtu, Berisha nxorri sot nga goja gjatë mbledhjes së qeverisë edhe këto fjalë: “Kryetari i opozitës më dukej i ngratë teksa shkonte tek deputetët e dyqanet e tyre në Durrës; e pa gjithë Durrësi si shkonte tek deputetët e vet. Dukej e pabesueshme, jo se s’ka njerëz që marrin me lista, por mos e politizo duke shkuar tek deputetët e tu. Nuk them që s’ka lista, por ne po bëjmë gjithçka, është e qartë si drita e diellit, nuk ka rritje të papunësisë në Shqipëri”

Dhe përsëri le t’i referohemi shifrave të INSTAT-it. Po të klikoni në nyjen http://www.instat.gov.al/graphics/doc/tabelat/Fp/3_mujori_II_2012/t1.xls do të shihni se numri i të punësuarve në tremujorin e dytë të 2012-ës ka qenë 933,263. Ndërsa në tremujorin paraardhës ka qenë 933,293. Pra kemi patur një ulje të punësimit në tremujorin e dytë. Dhe kur punësimi ulet, si u ulka edhe papunësia?

Nxitur nga ky kontroll faktesh, lind pyetja: Në qoftë se Rama qenka i ngratë, sipas Berishës, po ky i fundit vetë, ç’është?

E.Zaloshnja