"Shtetasi Sali Berisha" – sipas Spahiut… Që përsërit se dalja e shtetasit në fjalë në opozitë nuk mjafton

Në një intervistë me gazetarin Skënder Minxhozi në të përjavshmen JAVA, Kreshnik Spahiu flet për një "listë dosjesh" të atyre që “të pabuk i zuri nata, miliarder i gjeti dita”. Bie në sy që gjatë gjithë intervistës Spahiu shmang termin kryeministër dhe i drejtohet Berishës me "shtetasi Sali Berisha". Në fakt, Spahiu është politikani i parë që i përmend Berishës burgun pas humbjes së zgjedhjeve. E tha disa ditë më parë dhe e ka përsëritur në këtë intervistë.

Thotë Spahiu: "Lista nis me një nga njerëzit më të inkriminuar dhe që ka kryer tradhti kombëtare, duke nënshkruar dorëzimin e pjesshëm të territorit të Republikës Shqipërisë tek shteti fqinj Greqia. Ai është shtetasi Sali Berisha, një personazh i njohur emri i të cilit jo vetëm nuk duhet të harrohet kur ta largojmë pas disa muajsh nga pushteti, por që duhet gjykuar publikisht mbi një akuzë tashmë të provuar nga gjykata kushtetuese në shkelje dhe dhunim të integritetit territorial të Shqipërisë…. Shqipëria ka nevojë urgjente të zbatojë eksperiencën kroate të burgosjes të ish-kryeministrit Sanader, pas të cilës u hapën dyert e procesit të integrimit të Kroacisë në Bashkimin Evropian…".

Në pyetjen e Minxhozit: "Lista juaj e “dosjeve” përmban emra edhe të së majtës?" – Spahiu flet për dikë që "lundron me jaht që kushton 5 milionë euro", por nuk përmend emra: "Po përgatiten dosjet e një sërë qeveritarësh lokalë të Partisë Socialiste siç janë kryetarët e bashkive që janë bërë pjesë e trafiqeve dhe korrupsionit të përbashkët me ministrat demokratë. “Të pabuk i zuri nata, miliarder i gjeti dita” thotë një poet i madh shqiptar dhe kjo nuk mund të tolerohet për ata që vishnin opinga dhe sot lundrojnë në det me jahte që kushtojnë 5 milion Euro…" – është përgjigjja. – A.N.