Një ofertë amerikane surprizë në tenderin për Albpetrol

6 kompani (13 të tjera janë tërhequr) kanë paraqitur ofertat e tyre sot në ora 12.00 në METE në tenderin për privatizimin e kompanisë Albpetrol. Mediat njoftojnë se ka pasur oferta nga 52 milionë (rusët e Gazprom) e deri në një ofertë (me sa duket e papritur për të gjithë) 850 milionë euro nga një fond amerikan investimesh nga Çikago, nën konsorciumin Vetro Silk Road Equity Ltd. Katër ofertat e tjera mes këtyre dy shumave ishin: Amber Shine INC - 790 mln euro, Bankers Petrolium, 303. 8 milionë euro, Consorcium Win Bussines, 297 milionë e 600 mijë euro, ECOLOG INTERNATIONAL – DUBAI (u deklarua se nuk është e qartë vlera e ofertës).

Sipas së përditshmes "Shqiptarja.Com" online, kompania që i ka befasuar të gjithë të pranishmit me super-ofertën 850 milionë euro (deri sot në mesditë përflitej se vlera e afët e shitjes do ish diku te 300 milionë euro) është një kompani amerikane e cila paraqet një aktivitet, që nuk ka të bëjë me sektorin e hidrokarbureve, por është një ndërmjetëse financiare për investime të llojeve të ndryshme, e themeluar në 2003 në Çikago dhe me aktivitet në shtetet Karolina e Veriut dhe Karolina e Jugut
Edhe "Reuters" kishte një lajm mbi privatizimin e Albpetrol dhe përqëndrohej te dhënia nga qeveria e Tiranës pak orë para privatizimit e lejeve dhe licencave plus për Albpetrolin. Shiten 100 % të aksioneve dhe jo vetëm.

Shkruan "Reuters": "Vetro Energy, një konsorcium me bazë në SHBA, ka ofruar 850 milionë euro për Albpetrolin, më shumë se dyfishi i vlerës për asetet e kompanisë shtetërore shqiptare të naftës, thanë këshilltarët e shitjes. Oferta e Vetro Energy, e barabartë me 10 përqind të prodhimit të brendshëm bruto (GDP), ishte një nga pesë ofertat e hapura të premten përpara një audience ku përfshiheshin edhe reporterë, përfaqësues të kompanive ofertuese dhe bordi shtetëror i rishikimit të procesit. Duke bërë ofertën përmes konsorciumit Vetro Silk Road Equity Ltd jashtë Singaporit, Vetro Energy tejkaloi ofertën prej 790 milion eurosh të Amber Shine. Blerësi do të fitojë të gjithë asetet mbi tokë të Albpetrol dhe të drejtën për të eksploruar dhe shfrytëzuar gazin e naftën në territorin shqiptar për 25 vjet. Për të ëmbëlsuar më shumë marrëveshjen, qeveria i ka dhënë Albpetrol edhe të drejtën për të ndërtuar një rafineri dhe për të transportuar dhe shpërndarë gazin natyror... ". A.N.