Uithersi, si Rajersoni, i sugjeron Berishës të dalë në pension

Kur ish-amabasadori amerikan Uithers u pyet nga Sokol Balla mbrëmë rreth rrezikut të përqëndrimit të pushtetit në një dorë, u përgjigj duke sjellë shembullin e Xhorxh Uashingtonit. Tha Uithersi: “Xhorxh Uashingtoni, i cili jetonte jo shumë larg nga këtu, u quajt babai i Shteteve të Bashkuara të Amerikës. Popullariteti i tij ishte përtej çdo popullariteti që kanë gëzuar presidentët tanë në historinë e SHBA-së. Ai u zgjodh herën e parë dhe më pas për të dytën herë. Kur vajti herën e tretë, i thanë garo përsëri se ke për të fituar, por ai kishte një detyrim moral dhe u shpreh se dy mandate mjaftojnë për çdo president. Dhe me të gjithë atë pushtet që ishte gati për ta pasur përsëri të tijin, ai zgjodhi të tërhiqej”.  Duke dhënë këtë shembull, Uthersi praktikisht i ka sugjeruar Berishës që të tërhiqet nga politika pas kaq shumë kohe në pushtet.

Dihet publikisht që Uthersi nuk ka patur një marrëdhenie të mirë me Berishën. Por një këshillë të ngjashme dhe më të drejtpërdrejtë ia ka dhënë atij një ish-amabasador amerikan që ka patur marëdhënie shumë të mira me Berishën. Në një intervistë që kam zhvilluar me ish-ambasadorin Rajerson ne vitn 2007, me rastin e 15 vjetorit të fitores së parë në zgjedhje nga PD-ja (http://www.respublica.al/opinion/2011/09/21/rajerson-berisha-e-meriton-pensionin ), ai tha se Berisha e meriton pensionin. Konkretisht, pyetjes “A duhet  z.Berisha të dalë në pension?” ai iu përgjigj kështu:

“Siç e dini, unë jam amerikan dhe duke kërkuar në historinë e vendit tim për shembuj, më bën pershtypje ai i Xhorxh Uashingtonit.  Pasi kishte shërbyer si gjeneral në Luftën e Pavarsisë, ai u zgjodh dy herë si President i SHBA-së.  Dhe pas herës së dytë, Xhorxh Uashingtoni nuk kandidoi për herë të tretë.  Ai kishte bërë shumë për vendin dhe ishte krenar për arritjet e tij, por sidoqoftë, zgjodhi pensionin.  Mendoj se z.Berisha është në fakt në një situatë paralele - ai ka bërë shumë për vendin e tij, dhe e meriton të dalë në pension.  Ky do të ishte një hap i mirë për demokracinë si brënda PD-së ashtu dhe më gjerë në Shqipëri.  Kjo, sepse kështu do hapej rruga për të tjerë që të marrin përsipër përgjegjësitë.  Unë personalisht mund të konstatoj se jeta në pension s’është fare e keqe!”

E.Zaloshnja