Withers: Po rrëshqisni drejt së keqes... Pas Nishanit, vjen politizimi i gjykatave... Zgjedhjet e 8 majit? S'di a i fitoi vërtet Basha

"Situata është përkeqësuar. Unë mendoj se frika (dhe do ta përdor këtë fjalë frikë), që unë kisha për atë që do të ndodhte me institucionet e pavarura demokratike, ndodhi... Për momentin Shqipëria është duke qëndruar në buzë të greminës...". Këto janë vetëm disa nga pohimet e ish-ambasadorit amerikan Withers dhënë në një intervistë gazetarit Sokol Balla nga SHBA, të cilën mund ta lexoni të plotë edhe në kolonën përbri këtu në ResPublica. Duke folur për debatin mbi imunitetin Withers e nis analizën nga ajo që do ndodhë me drejtësinë pas zgjedhjes së Nishanit president:  

"...Tani me zhvillimet e fundit, përfshi këtu edhe zgjedhjen e presidentit...  Ai është edhe siç premtoi kryeministri, një besnik i PD. Nuk është aspak gabim të jesh besnik i PD, por në klimën dhe rrethanat që kalon Shqipëria sot, a do të demonstrojë z.Nishani se është një njeri i pavarur në ato raste kur do t’i duhet të ngrihet kundra vullnetit të kryeministrit?  Jam shumë skeptik se ai do ta bëjë një gjë të tillë. Nëse ju nuk keni pikëpamjet personale dhe vullnetin për t’i mbrojtur këto pikëpamje, thjeshtësisht ktheheni në atë që ne e quajmë “YES Man”, njeriu lepe-peqe për gjithçka... Tani lind pyetja: cilët do të jenë njerëzit që do të emërohen nga presidenti Nishani dhe a do të munden ata të qëndrojnë të pathyeshëm nga tekat e PD?... Tani nëse keni një gjykatë të kompozuar nga gjykatës, të cilët do të anojnë nga njëra parti politike, si mund të keni një sistem drejtësie që flet dhe i shërben të gjithëve? Ne e dimë rrezikun e politizimit të gjykatave...  Këtu në shtëpinë time është një foto e Musine Kokalarit gjatë gjyqit të saj ku në fytyrën e saj duket një shprehje shpirtërore pafajësie, sepse ajo ishte e pafajshme. Por ishte politikisht e domosdoshme për regjimin komunist të sulmohej, pasi konsiderohej e rrezikshme për ata.... Nëse gjykatësit apo njerëzit e drejtësisë zgjidhen sipas kritereve politike, atëherë kjo është e rrezikshme.... Shikoni se çfarë është duke bërë Putini në Rusi. Shikoni ç’po ndodh në Hungari, Rumani, Gjeorgji, shikoni ç’po ndodh në Ukrainë. Atje ju keni një kundërshtar politik të gjithë-pushtetshëm, i cili e burgosi atë, të cilën fliste në emër në popullit, duke urdhëruar gjykatat të vepronin në këtë mënyrë. Kjo është ajo rrëshqitja e ngadaltë në drejtim të së keqes. Për tre vjet unë kam ngulmuar kur jam shprehur për t’i pasur institucionet e pavarura..."

Sokol Balla e pyet dikur në intervistën e gjatë edhe për zgjedhjet e 8 Majit... "Ish-ministri i Brendshëm gjatë 21 janarit mundi liderin e opozitës dhe ish-kryeministri me partinë e tij morën gati më shumë se 50% të votave në këto zgjedhje. Çfarë po ndodh për mirë apo për keq në demokracinë tonë?" - është pyetja. Dhe Withers përgjigjet:  "...Fillimisht para se të përgjigjem, ngrihet pyetja: A i fitoi Lulzim Basha me të vërtetë zgjedhjet për kryetar të Bashkisë së Tiranës? Ajo ishte shumë e çuditshme dhe e pajustifikueshme. Ndryshimi i rregullave të lojës, numërimi i votave të hedhura gabim etj, treguan se kjo nuk është rruga mbi të cilën ecën demokracia. Sistemi i gjykatave, në veçanti ai i Kolegjit Zgjedhor u duk i pa interesuar për ligjin dhe KQZ u duk se ndihmoi maxhorancën. Mbetet një pyetje e hapur se kush fitoi në ato zgjedhje...". - A.N.