Zonja e parë nuk ka për model ndonjë zonjë të parë jashtë Shqipërisë... Apo ka?

Zonjat e Para të Shqipërisë kanë ruajtur përgjithësisht një profil të ulët publik, por kjo traditë me shumë gjasa po thyhet me bashkëshorten e presidentit të ri, Bujar Nishani. Odeta Nishani një 46-vjeçare e rritur në Elbasan dhe e diplomuar për inxhinieri ndërtimi, përveçse ka tashmë një seksion personal në faqen zyrtare online të Presidencës - (krahas moduleve "deklarata", "veprimtari" etj, aty shihet që në home page moduli "zonja e parë") - është edhe prezente rregullisht në media, pa bërë dallime: nga revistat e modës e deri te të përditshmet e lajmit. 

Sot kishte një intervistë të re në të përditshmen "Shekulli", ku fliste për politikën, veshjen, kuzhinën, arredimin etj. Pasi përgjigjet (pa surpriza) për zonjat e para të Shqipërisë, - ("zonja Berisha në gjykimin tim ka pasur dimension të plotë dhe më aktiv" – ish' përgjigjja), - gazetarja e "ndërkombëtarizon" paksa situatën dhe e pyet: "Cilën nga zonjat e para amerikane do të donit të zgjidhnit si model?". Thotë znj.Nishani: "Mishel Obama më pëlqen. Për tipin sportiv, karakterin e fortë dhe sigurisht ngjyrat që vesh".

Përgjigja është disi e ndryshme nga përgjigja që ka dhënë për të njëjtën pyetje në një intervistë të botuar po këto ditë në revistën "Madame MAPO", ku gazetarja e pyet: "A ka një model zonje të parë? Zhaklin Kenedi, Mishel Obama apo Karla Bruni. Ku do ndiheshit më komode?" dhe ajo përgjigjet: "Sigurisht që secila prej tyre është e shquar për elegancën dhe stilin e veçantë, por unë do të përpiqem të jem vetvetja".

Epo... Mungesë vëmendje e intervistueseve ndoshta. Ose e intervistuara e ka rimenduar këtë punë dhe do ketë ndërruar mendje këto ditë :) - A.N.

Intervista e plotë, Madame MAPO:

http://issuu.com/gazetamapo/docs/madamemapo?mode=window&back...

Intervista e plotë, Shekulli:

http://shekulli.com.al/web/p.php?id=3804&kat=104