Dënohen vajzat e "Pussy Riot"... dhe lexoni çfarë thotë Putin

Një gjykatë në Moskë ka shpallur fajtore tri anëtaret të grupit "Pussy Riot". Tri vajzat u dënuan me dy vjet burgim. Gjykata i dënoi “për huliganizëm të motivuar nga urrejtja fetare”. Gjykatësja Marina Sirova tha se anëtaret e bendit “kishin planifikuar me kujdes” aksionin e tyre të 21 shkurtit brenda katedrales Krishti Shpëtimtar. “Tolokonikova, Samuceviq dhe Aljokina kanë kryer huliganizëm - kjo është shkelje serioze e rendit publik, duke shprehur mosrespekt të hapur për shoqërinë, të motivuar nga armiqësia dhe urrejtja fetare”, tha gjykatësja.

Amnesty International tha se ato tria janë të burgosura të ndërgjegjes. Lideri rus opozitar i Frontit të Majtë, Sergei Udalcov, duke folur para gjykatës (para se të arrestohej vetë), tha se anëtaret e grupit janë linçuar. “Nuk kam qenë asnjëherë tifoz i ‘Pussy Riot’. Derisa janë arrestuar unë nuk i kam kushtuar vëmendje artit të tyre. Por, kur e kam parë se po zhvillohet një linçim i vërtetë politik, një linçim kundër tri vajzave të parrezikshme, unë jam tmerruar deri në thellësi të shpirti tim”, tha Udalcov.

Vajzat mohojnë se kanë pasur për qëllim që të ofendojnë besimtarët. Ato thanë se aksioni i 21 shkurtit në Katedralen e Krishti Shpëtimtar ishte protestë kundër lidhjeve të ngushta në mes të kishës dhe shtetit dhe në veçanti për shkak të mbështetjes që lideri i Kishës Ortodokse Ruse, patriarku Kiril i ka dhënë presidentit Vlladimir Putin në fushatën zgjedhore presidenciale të mbajtur në vitin e kaluar. Rasti ka shkaktuar reagime ndërkombëtare. Ish-anëtari i Beatles, Pol Mekartni dhe Madona iu janë bashkuar qeverive perëndimore për të kritikuar rastin.

Kurse vetë Putin ka kërkuar 'të zbatohet ligji' duke u shprehur se 'këtë punë e dinë gjykatat', por megjithatë ka "shpresuar" mos "dënohen ashpër": “Nuk duhet të dënohen ashpër për këtë. Shpresoj se ato do të mësojnë diçka nga kjo vetë. Por, i takon gjykatës që të marrë vendimin final”. Mos ju kujton dikë kjo mënyrë të foluri e mbushur me "besim te ligji dhe gjykatat", por e plotësuar me ndonjë "sugjerim të vogël"? (A.N.)