Debat në Gjermani: Duhet t'na përfaqësojë në Olimpiadë e dashura e dikujt me ide naziste?

Në Gjermani ka lindur një debat lidhur me rremtaren olimpike që përfaqëson kombin, Nadja Drygalla (mund ta shihni në foto), e cila është kryqëzuar nga një pjesë e opinionit publik e politik për shkak të një lidhjeje dashurie më një eksponent të partisë naziste në Rostok. Pas bujës në shtyp, Nadja e la Olimpiadën. Ajo ka mohuar të jetë në mbështetje të ideve naziste të të dashurit; ka mohuar gjithashtu të ketë marrë pjesë në veprimtari politike të tij; por nuk ka pranuar ta rrijë më gjatë në Olimpiadë. Edhe sikur të rrinte, me shumë gjasë do ta largonin këto ditë, që ‘sekreti’ ka dalë në shesh.

Pyetja që shtrohet në debatin në fjalë është: Mund ta përfaqësosh Gjermaninë në arenën ndërkombëtare, nëse i dashuri/e dashura jote është nazist? Opinionet e qëndrimet janë të kundërta. E përditshmja konservatore Frankfurter Allgemeine Zeitung është e idesë (e shprehte në editorialin e saj), se “përsa kohë që s’është provuar se idetë e vozitëses Drygalla janë naziste, ajo nuk mund të ndëshkohet për zgjedhjen që ka bërë në jetën private”. E përditshmja e qendrës së majtë Süddeutsche Zeitung fokusohet tek faji i zyrtarëve: “Nadja Drygalla është larguar nga policia për shkak të këtij fakti. Dhe është e çuditshme se si Drygalla ia ka dalë të kalojë filtrin e ministrisë dhe të shërbimeve sekrete në këtë rast, dhe të marrë akreditimin për në Olimpiadë (sipas kësaj gazete, të gjithë ata që përfaqësojnë Gjermaninë në një veprimtari të tillë, përfshirë dhe gazetarët, marrin ok-in e shërbimeve sekrete e të strukturave të tjera)?”. E përditshmja e majtë Berliner Zeitung njeh delikatesën e rastit (“nuk duhet të ketë vend në sport për ata që i ndajnë njerëzit në të mirë e në të këqinj mbi bazën e ngjyrës, racës, kombësisë, fesë, etj, por pikërisht mbi këtë bazë nuk duhet t’i vërsulemi kësaj ‘nazisteje’ të supozuar”, thuhet në thelb në editorialin e saj), por kritikon strukturat e drejtimit të sportit që nuk e kanë trajtuar si problem. Etj., etj.

E.G.