Mund të përfshihet në një histori si kjo një kryetare Kuvendi?

Gazetari Arben Muka, i njohur edhe si korrespodent i radios Deutsche Welle në Tiranë, duket i skandalizuar nga një veprim i ditëve të fundit i Jozefina Topallit. Në një shkrim me titull “Topalli dhe mamografia te privati”, mes të tjerash ai shkruan:
“...Ajo që kam parë ditën e martë më ka befasuar. Në fillim në ekranet e televizioneve dhe më pas në faqen elektronike të Parlamentit kam parë zonjën Jozefina Topalli me foto, shoqëruar dhe me tekst të hollësishëm, që e tregonte duke shpërndarë kupona për shërbimin falas të Mamografisë dhe Paptestit në një... spital privat të huaj në periferi të Tiranës. Gjithnjë sipas lajmit që shpërndahet online nga Parlamenti, znj. Topalli duke patur si sfond një banner të madh ku reklamohej spitali i huaj privat u ka shpërndarë atyre “kuponin për diagnostifikimin falas të Mamografisë dhe Paptestit”....
Shkrua më pas pas Muka: “...Më duket i pavend akti i orientimit të pacienteve gra për tek privati. Rrjeti i spitaleve jopublike (duke përfshirë dhe spitalin që ka bashkëpunuar me Kryetaren e Parlamentit) në të gjitha profilet e shërbimit që ofron ka një sistem dinamik të promocionit, për të cilin shpenzon fonde me qëllimin e vetëm për të patur sa më shumë pacientë në ambientet e tyre. Kjo ecën sipas logjikës se ekonomisë e tregut dhe nuk ka vend për kundërshti. Por ama pjesë e sistemit promocional nuk mund të bëhet një Kryetare e Parlamentit. Cili është efekti afatgjatë i një fushate ndërgjegjësimi, ku në qendër është Kryetarja e Parlamentit të Shqipërisë? Të ndajë kupona për një spital privat, apo të ndihmojë në përmirësimin e kushteve të sektorit publik shëndetësor?
Në fund Muka hamendëson nëse veprimi i Topallit cytet edhe nga fakti që “në këtë mandat, sektorin publik shëndetësor e menaxhon një parti anëtare e koalicionit qeveritar, që nuk para gëzon ndonjë simpati të veçantë nga znj. Topalli...?”
A.N.