Ç’janë këto vila e apartamente në bregdet që kushtojnë sa një shtëpi në Bathore??

Keni rastisur ndonjëherë të shihni kur takohen dy ministra në aeroportin e Rinasit? Kur janë me miq ose familje dhe ikin jashtë për pushime, shopingje, ndonjë takim...? Nuk është barsaletë. Pyetja e parë që shkëmbejnë me njëri tjetrin është: “Ke qenë nga fshati”? ose “Nga fshati po vjen apo nga Tirana”? Për cilin “fshat” flasin? Eshtë si tip kodi që meriton ndoshta edhe ndonjë lloj analize tjetër veç këtij shënimi të shkurtër. Por me “fshat” kanë parasysh shtëpitë apo apartamentet në Qerret, Golem, Gjirin e Lalzit etj.
Shumë është përfolur për to, por gazeta Shqip ka botuar sot një listë të ministrave që kanë vila, apartamente, shtëpi e shtëpiza druri, përgjatë bregdetit shqiptar, kryesisht në afërsi të Tiranës, në Kavajë e Gjirin e Lalzit (gjë që tregon se nuk përdoren vetëm për pushime, por gjatë gjithë vitit për shkak të afërsisë me kryeqytetin). Sipas vëzhgimit të gazetës ministrat kanë rendur pas një trendi të krijuar në Gjirin e Lalzit nga Argita Berisha e Ilir Meta, të cilët kanë qenë të parët që kanë blerë vila në këtë zonë. 11 nga 15 ministra kanë prona të tilla.
Politikanët i kanë të gjithë duart në vazon me mjaltë. Është profesioni i dytë më i vjetër në botë.Por ajo që bën përshtypje janë çmimet dhe motivimet e blerjes së këtyre vilave: Ose kushtojnë shumë lirë, ose janë me “këmbime” ose janë “dhurata” etj. Psh, vilë 166 m2 në Gjirin e Lalëzit që kushton 56 mijë euro (Argita Berisha)... Vilë 317 m2 në Gjirin e Lalëzit me këmbim trualli (Ilir Meta)... Vilë 79 m2 në Gjirin e Lalëzit 35 mijë euro (Myqerem Tafaj)... Vilë në Qerret 90 m2, 6 milionë lekë (Genc Ruli)... E po kështu Arben Imami, Aldo Bumci (ky e ka blerë 1.6 milion lekë!) Vangjel Tavo (dhuruar nga vëllai) etj, etj. Ç’janë këto vila e apartamente në bregdet që kushtojnë sa një kasolle në Bathore?? A ka për të gjithë? :) (A.N.)