Scoop i shqiptares.com: Berishajt paguajnë për një foto me Cameron-in

Qeveria shqiptare porositi një agjenci lajmesh në Londër që të fiksonte fotografinë e takimit mes kryeministrit të Shqipërisë Sali Berisha dhe kryeministrit britanik David Cameron.
Shkrepja u bë mesditën e 27 korrikut, ndërsa kryeministri ishte i ftuar në Pallatin Mbretëror për tu takuar me mbretëreshën Elisabet. Pas takimit me madhërinë e saj, edhe takimi me kryeministrin britanik, David Cameron, aq shumë i lakmuar.
Fotoja është mbresëlënëse: Dy kryeministra të fiksuar në një foto, ku shqiptari flet me duar dhe këmbë, ndërsa britaniku me gishta kryqëzuar që ka fiksuar mimikën e rrudhur të fytyrës së qeshur përballë.
Për ta arritur deri te ajo foto është dashur pajtimi I një agjencie mediatike "The Press Association", me qendër në Londër. Mision që e ka marrë përsipër vetë z.Berisha, jo kryeministri, por Mal Berisha, i ngarkuari me punë në ambasadën Shqiptare në Londër.
E-MAILET
Të premten paradite, në orën 10.12, shtetasja londineze Gemma Dewhurst i nis një email ambasadorit të Shqipërisë në Londër, Mal Berishës: "I dashur Mal, të lutem gjej bashkëngjitur imazhin PA-14131607 që të kam premtuar. Do të lidhemi të hënën për të konfirmuar përdorimin dhe pagesën. Gjithë të mirat, Gemma". Imazhi në fjalë është fotoja që fiksoi takimin mes kryeministrave dhe është një foto shumë e bukur. 11 orë më vonë, i ngarkuari me Punë në Londër, Mal Berisha i shkruan një email tjetër Emma Dewhurst-it me subjektin "konfirmimi": "E dashur Gemma, të lutem më nis me email foton që kemi porositur (ishte Joana Papakostandini që sapo foli me ju në emër të ambasadës shqiptare në Londër). Unë jam i Ngarkuari me Punë i Shqipërisë. Të lutem nise menjëherë te adresa ime Berisham@gmail.com. Ne do t’ju paguajmë të hënën ashtu siç ratë dakord me zonjushën Papakostandini. Gjithë të mirat dhe faleminderit. Mal Berisha".

Joana Papakostandini është sekretarja e tretë e ambasadës shqiptare, e cila pas dorëheqjes së ish-ambasadorit Zef Mazi, mëse një vit më pare, ende nuk ka ambassador, por të ngarkuar me punë, zotin Mal Berisha, që shkoi atje me vendim të qeverisë në shkurt 2012.
Pas këtij letërkëmbimi online, fotoja është dërguar nga adresa e Mal Berishës te adresa e dhëndërrit të kryeministrit, Jamarbër Malltezi dhe më pas në adresën e zëdhënëses së kryeministrit Berisha, Erla Mëhilli. Pas kësaj kryeministria e shpërndau mbrëmjen e të premtes, bashkë me lajmin për bisedën e gjatë mes kryeministrave Cameron dhe Berisha në pallatin mbretëror. Por gabimisht, gjatë shpërndarjes së lajmit dhe fotos për takimin e shumëpritur me kryeministrin Cameron, zyra e shtypit pranë kryeministrisë nisi edhe bashkëbisedimin mes Mal Berishës dhe zonjushës londineze për të blerë në Londër një foto që shitet shumë shtrenjtë në Tiranë.
(Shkrimi u botua në numrin e sotëm të Shqiptarja.com)
(aq/sg/shqiptarja.com)