Arvizu, kafe me Ina Ramën, Berisha, not me veten… Dhe ndonjë pyetje jo retorike për faqet rozë dhe/ose politike

"….Ambasadori i SHBA-ve në Shqipëri Aleksandër Arvizu dhe kryeprokurorja e Shqipërisë, Ina Rama, janë kapur nga paparaci ynë disa ditë më parë, teksa janë takuar paradite në një nga baret e zonës së ish-Bllokut. Ata kanë pirë kafe së bashku larg syve kureshtarë dhe më pas janë ndarë me njëri-tjetrin. Kjo nuk është hera e parë që ambasadori Arvizu takon personalitete të jetës politike në vend dhe jo vetëm, dhe për këtë nuk zgjedh zyrat e tyre, por vendet publike…".

Teksti i mësipërm gjendet në faqet rozë të fundjavës në Panorama Plus bashkë me foton që kemi botuar këtu.

“Për të disatin vit radhazi, kryeministri Berisha ka sfiduar vetveten në detin e Dhërmiut, duke thyer rekordin e vendosur një vit më parë për qëndrimin sa më gjatë në ujë duke notuar. Këtë herë, shefi i Ekzekutivit, ka qëndruar 141 minuta, në ujërat e detit. Ky është një rekord i ri për kryeministrin Berisha, i cili këtë vit ka qëndruar 9 minuta më shumë në ujë, krahasur me vitin e kaluar. Vitin e kaluar ai ka notuar për 132 minuta …" etj

Xhevahiri i mësipërm gjendet në një njoftim zyrtar të Kryeministrisë të saposhpërndarë sot në mesditë. Vitet e kaluara, (bashkë me foton tashmë të njohur ku shihet një Berishë qafëzgjatur mbi ujë), njoftime si ky janë botuar rregullisht në faqet e politikës nëpër gazeta. Me gjasa edhe nesër do botohet në të njëjtat faqe. Po edhe kafetë e mëparshme të Arvizusë janë botuar më parë në faqet politike, madje janë marrë si sinjale të forta politike.

Pyetje: Nga çfarë shtyhen redaktorët e shtypit shqiptar për ta klasifikuar një lajm në faqe rozë apo në faqe politike? Cilat standarte editimi zbatohen? Dhe SA standarte editimi zbatohen? Pse një kafe e Arvizusë "me Lulin" përshembull është politikë dhe një kafe "me Inën" është lajm rozë? Ose pse një tekst-mualebi si ky i kryeministrisë i ngjishet në grykë publikut çdo vit si lajm politik kurse  veprime të tjera ku e ku më me interes publik se kaq, numërohen e mbrohen fort si "çështje private"?  Nuk janë pyetje retorike. Vërtet do ishte me interes që dikush që di më tepër nga puna nëpër redaksi ose në zyrat e shtypit të partive, të ndante me ne ndonjë mendim këtu në ResPublika.

(A.N.)