Kosova i jep lamtumirën Ali Podrimjes

“Ali Podrimja në Shtëpinë e Amshimit” – kështu titullohej raporti mbi varrimin e Ali Podrimjes në versionin online të Kohës Ditore. Zëri online ka titullin: “Ali Podrimja përcillet për në banesën e fundit”. “Podrimja iu bashkua Lumit”, thuhej në gazetën Express, duke evokuar për herë të n-të këto ditë djalin e tij, Lumin, që është ndarë nga jeta kohë më parë, e që la pas një dhembje të madhe në shpirtin e të atit poet. Edhe në sitet e tjera është përcjellë po njësoj lajmi mbi ceremoninë e varrimit të poetit Ali Podrimja.

Duke ndjekur reagimin e shoqërisë kosovare pas vdekjes së Podrimjes në distancën që ndan Tiranën me Prishtinën na është krijuar ideja se dhimbja për humbjen e tij i bëri bashkë të gjithë, larg pozave shtinjake. Ali Aliu tha sot në fjalën që mbajti para se Podrimja të përcillej në banesën e përjetshme, se “një popull që lind një poet si Ali Podrimja, është popull me fat; për gjysmë shekulli, ne shqiptarët u mësuam ta ndjejmë poezinë e Aliut, si një zë tmerrësisht tronditës, të mprehtë, të qëndrueshëm, bartës të dhimbjes së të gjithëve, si një melodi e përsosur që gjithnjë është aty kur na duhet dhe na shoqëron pa e kërkuar”.

Me sa duket, Ali Aliu ka folur për të gjithë.

Re.Pu.