Veton Surroi “ka provokuar” shumë vetë me letrën e tij për Dell-in

“Letra e lamtumirës” që Surroi ia ka dërguar publikisht ambasadorit amerikan në Prishtinë, Christopher Dell-it, nuk është publikuar ende e tëra, por jehona ka zënë të ndihet. Sot në Gazetën Express është Ilir Mirena, zv.ministër i qeverisë “Thaçi”, që polemizon me Veton Surroin (‘VS’ e quan ai gjatë shkrimit, me iniciale) e që ia pagëzon këtë letër me emrin ‘manifest i urrejtjes’. Ky ‘shpërthim’ i VS-së vjen prej një ëndërre të parealizuar presidenciale, thotë zv.ministri, dhe në fund bën një paralele me ëndërrën e Sara Goldfarb-it, personazh i filmit me titull ‘Rekuiem për një Ëndërr’ të Darren Aronofsky-t. Fabula është si më poshtë (po citojmë fjalë për fjalë shpjegimin e Mirenës, që ky vetë e ka marrë nga Wikipedia):

“Sara, një vejushë në moshë, jeton e vetme në Brooklin, kalon kohën pranë televizorit, derisa një ditë merr një telefonatë [që i thotë] se do të jetë pjesëmarrëse në njërin nga programet e saj të preferuara. Por nuk ia thonë se kur; duhet të presë. Pas asaj telefonate, atë e kap makthi i trupit të vet, që nuk ka më freskinë e rinisë. Ajo nxjerr nga dollapi një fustan të moçëm ngjyrë të kuqe, i cili nuk i përshtatet më moshës së saj të shtyrë. Që trupi i saj të futet brenda atij fustani, ajo ia nis një diete duke përdorur amfetamina. Përkundër këshillës së të birit se do të bëhet e varur nga amfetaminat, ajo insiston se mundësia për t’u paraqitur në televizion i ka dhënë asaj një motiv për të jetuar. Por Sarës ftesa nuk i mbërrin kurrë. Ajo fillon të ketë haluçinacione se është personazhi kryesor brenda shoë-t televiziv dhe njëkohësisht ndjehet e kërcënuar nga frigoriferi i saj, që i transformohet në një përbindësh. Derisa e tillë përfundon në një klinikë mentale.”

Dhe zv.ministri i Thaçit e përfundon shkrimin me fjalët: “Them se reagimi i VS-së është një rekuiem për një ëndërr, një ëndërr presidenciale”.

E.G.