Pyetjet (pa përgjigje) të Nazarkos mbi “një telefonatë të çuditshme”

“Mediat shqiptare trajtuan me indiferencë të madhe një telefonatë të të ngarkuarit serb për Kryeministër Ivica Daçiç me Presidentin e zgjedhur Bujar Nishani, - shkruan sot në Panorama Mentor Nazarko. Ish-këshilltari presidencial ngre disa pyetje në analizën e tij (e ka titulluar: "Një telefonatë e çuditshme"), të cilat i lë deri në fund të shkrimit pa përgjigje, por e thotë qartazi që kancelaria shqiptare nuk duhej ta kishte lejuar të ndodhte telefonatën Daçiç-Nishani .

Shkruan Nazarko:  “...ai nuk duhej t’i telefononte një Presidenti të zgjedhur, por Kryeministrit Berisha. Po atëherë ç’ka ndodhur? Daçiç ka telefonuar Berishën në fillim dhe pasi ka dështuar, i ka rënë telefonit të Presidentit të zgjedhur, i cili mbase është më i aksesueshëm? Apo i ka rënë drejtpërdrejt numrit të Presidentit të zgjedhur, Nishani? Në të dyja rastet, pra qoftë sikur Daçiç i refuzuar nga Berisha ka telefonuar Nishanin, qoftë sikur ai të ketë telefonuar drejtpërdrejt Presidentin e zgjedhur, kjo bisedë telefonike ngjan e çuditshme, pa përmendur unicitetin e saj në atë pak histori të presidentëve të zgjedhur shqiptarë. Dakord me mirësjelljen diplomatike, por kancelaria shqiptare s’duhej ta lejonte këtë telefonatë. D.m.th. Kryeministria apo Ministria e Jashtme – Presidenti s’ka ende staf të emëruar formalisht – ndoshta duhej t’i sugjeronte kreut të zgjedhur të shtetit të mos e ngrinte telefonin. E kemi të vështirë të imagjinojmë që zoti Nishani të ketë pasur ndonjë dëshirë ekstreme për t’u zhytur në politikën rajonale ende pa filluar zyrtarisht detyrën. Atëherë, pse ia ka ngritur telefonin një President i zgjedhur që s’e ka marrë akoma detyrën një Kryeministri të emëruar të një vendi tjetër që s’ka marrë akoma detyrën? Do të ngjante e papërshtatshme kjo telefonatë, edhe nëse Daçiç do të ishte Kryeministër në detyrë, pale tani që s’e ka filluar detyrën. Çfarë ka ndodhur realisht?”

(A.N.)

Në foto: Nishani, duke u përshëndetur me Berishën, pas votimit në raundin e katërt për zgjedhjen e Presidentit